Bible in duytsche (Delftse bijbel 1477)

§ Capittel .xxxvi.

1[35:26]

GOds ontfermherticheit is schone inden tide des vernoys: als wolken des reghens inden tiden der droecheit.

2[36:1]

Ontferme ons god alre dinghen ende ansie ons: ende thoen ons dat licht dijnre ontfermherticheit:

3[2]

ende sende dine vrese op die heydene. die di niet en sochten. soe dat si bekennen dat gheen god en is sonder dij. dat si dine grote dinghen vertellen.

4[3]

Heffe op dine handen optie vreemde heyden: op dat si dijn macht sien mogen.

5[4]

Want ghelijch dattu geheilicht biste in ons in haren aenscouwen: also sultstu verheuen worden in hem in onsen aenscouwen:

6[5]

dat si dij bekennen. also wi di bekennen: want ten is gheen god sonder di here.

7[6]

Vernyewe die teykenen: ende verwandele die wonderen.

8[7]

Glorificeer dijn hant ende den rechten arm.

9[8]

Verwecke den toren: ende stort neder die gramscap.

10[9]

Verheffe den wedersake: ende quelle den viant.

11[10]

Haeste tijt ende ghedencke teynde dat si dine wonderen vertellen.

12[11]

Hi worde verzwolghen in gramscap der vlammen die behouden wort: ende die dijn volc verquaden. moeten verlies vinden.

13[12]

Breke thoeft der princen ende der vianden. Die segghen ten is gheen ander

[p. *321]

sonder ons.

14[13]

Vergader alle die geslachten van iacob: ende si moeten bekennen dat gheen god en is dan du. dat si vertellen dine grootheden: ende du sultstese eruen als vanden beghinne.

15[14]

Ontferme dijns volcs op welken dijn naem aengeropen is ende israhels dien du ghelijc makes dijnen eersten gheboren soon.

16[15]

Ontferme der stat dijnre heilicheit iherusalems: der stat dijnre rusten.

17[16]

Veruolle syon mit dinen ouertellike crachten ende mit dijnre glorien dijn volc.

18[17]

Ghif oercondscap want si sijn van dijn creaturen vanden beginne ende verwecke die bedinghe die in dinen naem die voergaende prophete hebben ghesproken.

19[18]

Ghif loon die di ontbeiden dat dijn propheten ghetrouwe worden gheuonden: ende dijnre knechten bedinghe verhore.

20[19]

Na aarons benedictie ghif dijnen volke: ende leidse inden weghe der gherechticheit: dat sijt alle weten die wonen int tlant: want du biste god die bescouwer der werlden.

21[20]

Alle spise sal die buuc eten: ende die een spise is beter dan die ander spise.

22[21]

Die kinnebacken ghereiken te draghen die spisen ende die onwise herten loghenachtighe woerden.

23[22]

Tquade herte sal gheuen zericheden: ende een geleert man salt wederstaen.

24[23]

Dat wijf sal elken man ontfaen ende deen dochter is beter dan dander dochter.

25[24]

Eens wijfs schoenheit verlicht haers mans aensichte: ende si leit op die begheerte bouen al eens mans genoechte.

26[25]

Ist dat si die tonghe is van ghenesen ende des sachtmoedicheits ende van ontfermicheden. haer man en is niet na datter menschen kinderen sijn.

27[26]

Die een guet wijf besit hi beghint die besittinghe: si is hulpe van hem: ende ene columme als ruste.

28[27]

Daer gheen tvyn en is. daer sal die besittinghe te nyete gaen ende daer gheen wijf en is. sal die behoeuende mensche versuchten.

29[28]

Wien gheloeft hi dien gheen nest en heeft? Ende die neder neyghende is so waer dattet doncker is: als een ghestrorst rouer springhende vander eenre stat in dander stat.