Bible in duytsche (Delftse bijbel 1477)

§ Capit .xxxv.

1

DIe die wet behout: hi menichfoudicht die bedinghe.

2

Ene salighe offerhande is te verstaen ten geboden. ende wech te gaen van alre ongerechticheit.

3

ende is offeren genade der offerhande op die ongherechticheden: ende bedinghe voer sijn sonden:

4

wechgaende van die ongherechtichede hi sal gracie gheuen die blomen offert: ende die ontfermicheit duet hi offert sacrifici

5

Den here is bequaem of te gaen vander ongerechticheit

6

Du en sultste niet ydel openbaren voer des heren aenscouwen.

7

Want al dit duetmen in des heren gebot

8

Eens gherechtichs offerhande maect vet den outaer: ende si is roke der sueticheit indes alren hoechsten gods aenscouwen.

9

Eens gherechtichs sacrificie is ontfanclijc ende die here en sal haer gedencken niet vergheten.

10

Mit gueder

[p. *320]

herten ghif gode glorie: ende en mindere niet die primicien dijnre handen.

11

In allen gauen maec dijn aensicht blijde. ende in blijscappen heylighe dijne thienden.

12

Ghif den hoechsten na sine ghiften: ende in gueder oghen maec een vinden dijnre handen:

13

want die here ist gheldende. ende hi salt di also dicwijl seuenwaruen ghelden.

14

En wil niet offeren quade ghiften: want hi en sal die niet ontfaen

15

Ende en wil niet aensien ongherechtige sacrificien: want die here is rechter: ende voer hem en is gheen glorie van desen personen.

16

Die here en sal niet ontfaen den persoen teghen den armen: ende hi sal verhoren des ghequetsts bedinghe

17

Hi en versmaet niet bedinghe eens weesen: noch der weduwen. op dat sij wtgheeft sprake mit ghesuchten.

18

En gaen der weduwen tranen al die wanghen niet nederwaert: ende haer geroop opten ghenen diese duet wenen?

19

Want vander wanghen varen si op inden hemel. ende die here die verhoerer en salre ghene ghenoechte in hebben.

20

Die gode aenbeet hi sal worden ontfaen in ghenoechten: ende sijn bedinghe sal totten wolken naken.

21

Des gheens bedinghe die hem veroetmoedicht. sal doer die wolken varen: ende en sal niet ghetroest worden voer dat si genaect is: ende si en sal niet wech gaen voer datse die alre hoechste aensiet.

22

Ende die here en sal hem niet veruorderen: mer hi sal oerdelen die gerechtighe ende doen vonnis: ende die alre starcste en sal in haer ghene ghedoechsaemheit hebben: dat si haer rugghen bedrouen

23

ende den luden ghelden wrake: tot dat hi wech ghedaen heeft die volheit der houaerdigher. ende der ongherechter cepteren sal hi bedrouen:

24

tot dat hi den menschen loenen sal na haren daden ende na adams werken ende sijn ouerdaet

25

tot dat hi vonnissen sal sijns volcs vonnisse: ende dat hi die gherechtighe in genoechten setten sal bi sijnre ontfermherticheit.