Bible in duytsche (Delftse bijbel 1477)

§ Ca .xxxiiij

1

EEnen sotten man is. ydel hope ende logen: ende die dromen verheffen die onvroede.

2

Ghelijc enen die die scaduwe begrijpt ende den wint nauolghet: alsoe is hi die verstaet tot loghenachtighe visioene.

3

Dat na tvisioen der dromen voer des menschen aensichte is die ghelikenisse van eens anders menschen.

4

Wat sal vanden onsuueren worden ghesuuert? Ende wat waerheit sal vanden logenachtighen gheseit worden.

5

Waersagherye der dolinghe ende touerie wort waer gheseit: Waersagherie der dolinghe ende touerien loghenen ende dromen. is ydelheit der gheenre die quaet doen.

6

Ende gheliken een wijf die kint baert. also ghedoecht dijn herte fantasie: ten si dan vanden oppersten visitacien opgesent worden. Ghif dijn herte in dien niet.

7

Want die dromen hebben veel lieden doen dwalen: ende dier in hope sijn daer neder gheuallen.

8

Sonder logen sal dat woert der wet eynden. ende die wijsheit sal worden gheuest in een ghetrouwe herte.

9

Die niet ghetempteert en is wat weet hi? Een man in veel dinghen gheleert sal veel dinghen pensen: ende die vele gheleert heeft hi sal die verstandenisse vertellen.

10

Die

[p. *319]

niet beproeft en heeft bekent luttel: ende die in veel dinghen sot is. sal sijn quaetheit menichfoudighen.

11

Die niet ghetempteert en is wat weet hi? Ende die bedroghen is sal oueruloeyen in quaetheden

12

Ic hebbe veel ghesien vertellende: ende veel ghewoenten van woerden.

13

Sulker tijt heb ic in vresen gheweest totter doot. om die sake van desen: ende ic wort verlost mitter gracien gods.

14

Der gheenre gheest die gode ontsien. sal worden ghesocht van hem: ende in sijnen aenscouwen sullen si worden ghebenedijt.

15

Want haer hope is inden ghenen diese behout: ende gods oghen sijn opten genen dien minnen.

16

Die gode ontsiet en sal niet vresen ende niet beuen: want hi is sijn hope

17

Des gheens ziele is salich die gode ontsiet

18[34:19]

Des heren oghen sijn opten ghenen dien ontsien: beschermer der macht. vastheit der cracht: decsel der hetten ende scaduwe des middaghes:

19[34:20]

bedinghe des belghens. ende hulpe des vals: die zielen verheffende ende die oghen verlichtende gheuende ghesontheit ende dat leuen ende benedictie.

20[34:21]

Des gheens offerhande is besmet die offert van ongherechtigen guede: ende der ongherechtiger onwaerdicheden en sijn niet bequaem.

21[34:22]

Die here allene is den ghenen die sijns ontbeiden inden weghe der waerheit ende der gherechticheit.

22[34:23]

Ende der ongerechtigher ghiften en prouet die alre hoechste god niet: noch hi en aensiet niet inder ongherechtigher offerhande: noch in die menichte van hare sacrificien. so en sal hi haer sonden niet vergheuen.

23[34:24]

Die offerhande offert vander armen guede is als een die den sone dodet in sijns vaders aensichte.

24[34:25]

Broots ghebrec te hebben is der armer leuen: ende die dat onthout hi is een mensche des bluets.

25[34:26]

Die inden zweete dat broot dect. is als een die sinen naesten dootslaet.

25[34:27]

Die bluet wtstort. ende die loesheit duet sinen huerknecht. sijn ghebrueders.

27[34:28]

Een stichtende ende een brekende: wat vordert hem sonder den arbeit?

28[34:29]

Een biddende ende een vlokende: wies stemme sal god verhoren?

29[34:30]

Die ghedwoghen is vanden doden ende dien weder an tast: wat helpt hem sijn dwaen.

30[34:31]

Aldus is een mensche die vast voer sijn sonden. ende weder die selue duet: wat profijt duet hij hem seluen veroetmoedighende? wie sal sijn bedinghe verhoren.