Bible in duytsche (Delftse bijbel 1477)

§ Ca .xxxij

1

HEbbense di enen regeerre gheset. en wil di niet verheffen: mer wes onder hem luden als een van hem.

2

Hebbe sorghe van hem ende also merc: ende als dijn sorghe voldaen is ganc sitten eten.

3

op dattu moghes verblijden om hem luden: ende ontfanc behagelheit van gracien tot eenre cronen: ende beiach waerdicheit der vergaderinge

4

Spreec mitten meeste van gheboerte: want het betaemt di.

5

Dat eerste woert den genen die wetenheit mint: ende en belette den sueten sanc niet.

6

Daer gheen hoerres en sijn en brenct gheen redenen voert: ende en wil niet ontamelijc worden verheuen in dijnre wijsheit.

7

Een carbonckelsteen in een behaghelheit van goude: is te trecken teghen guede sanghers inder werscap van wijn.

8

Ghelijc dat een teyken van smaragdo is een ghesmedet dinc van goude: also is tgetal van gueden sanghers in blijden ende ghemanierden wijne.

9

hoer swighende ende ouerwaerdicheit sal di toecomen guede gracie.

10

Iongelinc spreec in dijn sake cume alst noot is.

11

Bistu tweewarf ghevraghet: so hebbe dijn hoeft dijn antwoerde.

12

Wes in veel dinghen als niet wetende: ende hoer al swighende oec ende vraghe.

13

En vermet di niet te spreken int middewaert van groten luden: ende daer oude luden sijn en spreec niet veel.

14

Voer den haghel sal blixem vergaen: ende voer scaemte sal gracie vergaen: ende voer wardicheit sal di ancomen guede gracie:

15

ende in die vre van opstaen en vluchte dijn hare niet Coomt voer in dijn huys ende worde darwaert gheropen: ende daer spele:

16

ende doch dijn inualle mer niet in misdaden. ende in houerdighen woerden.

17

Ende op alle dese dinghen benedie den here die di ghemaect heeft: ende die die veruollet in alle sinen gueden.

18

Die gode ontsiet sal sijn leringhe ontfaen: ende die tot hem waken sullen sine benedictie vinden.

19

Die die wet soect. salre of veruolt worden: ende die verradelijc duet. salre in gheschent worden.

20

Die den here ontsien

[p. *317]

sullen gherechtich vonnis vinden: ende si sullen die gherechticheden doen bernen als een licht

21

Een man een sondaer sal scouwen berispinge: ende na sinen wille sal hi vinden ghelikenise.

22

Een man van rade en sal die verstandenisse niet versteken: een vreemde ende een houaerdich en sal die vrese niet ontsien.

23

Oec na dien dat hi mit hem ghedaen heeft sonder raet: so sal hi worden berispt in sijnen nauolghinghe.

24

Sone en doch niet sonder raet: ende na die daet sultstuus ne ghene rouwe hebben.

25

En ganc inden weghe des vals niet. ende du en sultste di niet stoten inden steen: noch en geloue di niet te pijnliken weghe: dattu dijnre zielen gheen scande en legghes.

26

Ende wachte di van dinen kinderen: ende hoede di van dijnen huysluden.

27

In allen dijnen werken gheloef van trouwen dijnre zielen: want si is dat behouden vanden geboden.

28

Die gode geloeft verstaet ten gheboden: ende die hem betrouwt hi en sal niet gheminret worden