Bible in duytsche (Delftse bijbel 1477)

§ Capit .xxx.

1

DIe sijn kint mint die gheue hem dicke die ruede: op dattet verblijde in sijnen wterste: ende dattet niet en tast te sijnre naeste doren.

2

Die sijn kint leert hi salre in worden ghepresen: ende int midden sijnen huysluden sal hi hem verblijden.

3

Die sijn kint leert die laet sijnen viant in nydicheit: ende int midden sijnre vrienden sal in hem verblijt worden.

4

Sijn vader is doot: ende hi is of hi niet doet en waer Want hi hetft enen ghelijc hem achter ghelaten.

5

In sijnen leuen sach hi hem ende hi wort in hem verblijt. Ende in sine doot en wort hi niet bedroeft: noch en wort bescaemt voer sine vianden.

6

Want hi lieten enen beschermer sijns huys teghens die vianden: ende die danc gheeft sijnen vrienden.

7

Voer der kinderen zielen sal hi sijn wonden toebinden. ende sijn binnenste sullen worden verstormet op alle stemmen.

8

Een onghetemmet paert ontgaet hardelijc: ende een lidende soen sal nederwaert ontgaen.

9

Smeec dijn kint. ende tsel di doen in vresen wesen: speel mit hem ende het sal di bedrouen.

10

En lache noch en droue mit hem niet. dat inden vtersten dijn tanden niet eggich en worden.

11

En ghif hem ghene macht in sijnre ioncheit: ende en veronwaerde sine ghepensen niet.

12

Bughe sijnen hals in sijnre ioncheit. ende slach sijn zide alst een kint is: dattet machschien niet en verharde ende di niet en gheloue: ende dat di dan rouwe si dijnre zielen.

13

Leer dijn kint ende werc in hem: dattu niet en verbelchs in sijnre vuylheit.

14

Beter is een arm mensche ghesont ende starc: dan een onghemogende rijc ende ghegheselt in quaetheden

15

ende ghesontheit der zielen in heyligher gerechticheit: si is beter dan alle gout ende siluer: ende een starc lichaem dan een onghemeten sin.

16

Gheen sin en is bouen den sin des lichaems salicheit: ende ghene ghenoechte en is bouen der herten blijscap.

17

Beter is die doot dan een bitter leuen. ende ewelike ruste dan ghedurende quale.

18

Dat guet dat verborghen in enen besloten mont is: als gherechten van werscappen die omtrent een gracht geset sijn.

19

Wat vordert eenre beelden dat smeken? Want si en eet noch en gheruyct:

20

aldus is een die veriaghet wort vanden here: ende draghende den loon der ongherechticheit.

21

Siende mitten oghen ende versuchtende: ghelijc enen ghemaecten man ommehelsende ene maghet ende versuchtende

22

Ende ghif ghen sericheit dijnre zilen: ende en quelle dij seluen niet in dinen rade.

23

Der herten vruechde is des menschen leuen: ende die scat sonder ghebrec van heilicheden: ende eens mans verblijden is langhe leuen.

24

Ontferme dijnre zielen gode behaghende: ende behoude ende vergader dijn herte in sijnre heylicheit: ende die droefheit verdrijf verre van di.

25

Want die droefheit veel luden doot: ende in haer en is gheen oerbaerlijcheit.

26

Toren ende gramscap minderen die daghen. ende voer tijt sullense brenghen die ghepensen outheit aen.

27

Een guet herte is blicken-

[p. *315]

de in werscappen: want sijn werscappen ghereet men seer naerstelijc.