Bible in duytsche (Delftse bijbel 1477)

§ Capittel .xxviij.

1

DIe ghewroken worden wil. hi sal van gode wrake vinden: ende houdende sal hi sijn sonden houden.

2

Verlaet dinen naesten die di deert: ende dan sullen dij dijne sonden verlaten worden alstuuts biddes.

3

Een mensch hout enen mensche gramscap: ende hi eysschet van gode buete.

4

In enen mensche sijns ghelike en heeft hi gheen ontfermherticheit ende hi bidt ouer sijn sonden?

5

Hi al is hi vleysch houdet die gramscap: ende hi eyscht guedertierenheit van gode? Wie sal bidden voer sijn sonden?

6

Gedenc dijnre vterste: ende laet viantscap te draghen.

7

Want quellinghe ende die doot coemt aen in sijn gheboden.

8

Gedencke gods vrese: ende en worde niet gram op dinen naesten.

9

Ghedencke des alren hoochsten testament: ende veronwaerde dijns euens kersten onwetenheit.

10

Wachte di van stride: ende du sultste die sonden minderen.

11

Want een gram mensche verwarmt gestrijt ende een man een sondaer verstoert vriende: ende int midden den ghenen die

[p. *312]

vrede hebben. sal hi viantscap brenghen

12

Want nae thout vanden bussche: also ontsteect dat vier: ende na eens menschen cracht alsoe sal sijn gramscap wesen: ende na sijn guet sal sijn gramscap verheffen.

13

Haestich strijt ontsteket vier: ende haestich gheschelt sal bluet wtstortten ende die oercondende tonghe sal die doot aenbrengen.

14

Ist datstu blaeste soe salse barnen als vier: ende spuwetste daer op so salse ghelesschet worden. Ende beide coemen wt den monde.

15

Een runaer ende mit tween tonghen sal vermaledijt wesen: want si salre veel verstoren die vrede hebben.

16

Die derde tonge heeft veel luden beruert: ende heeftse ghestroeyt van enen volc inder anderen.

17

Si heuet der riker luden ghemuerde steden ghedestrueert: ende groter luden husen auerecht gheworpen.

18

Der volken cracht heeft si ontween gehouwen. ende starcke luden gescheiden.

19

Die derde tonge heeft wiuen die mannen hadden verdreuen: ende heeftse beroeft van haren arbeide.

20

Die die aenscouwet hi en sal gheen ruste hebben: noch hi en sal ghene vrienden hebben daer hi in rusten sal.

21

Der gheeselen wonden die makent blaeu: mer der tonghen wonde sal die bene breken.

22

Vele luden sijn gheuallen in des zwaerts mont: mer si en sijn also niet doet als die ghene die verderft sijn bi hare tonghen.

23

Salich is hi die bedect is vander quader tonghe: die niet ouergeleden en is in haer gramscap. ende die haer an hem niet ghetoghen en heeft: ende in haren banden niet ghebonden en is.

24

Want haer ioc is een yseren ioc: ende haer bant een metalen bant.

25

Haer doot is die alre quaetste doot: die helle is oerbaerliker dan sij.

26

Haer gheduricheit en sal niet bliuen: mer si sal behouden der ongherechtigher weghen. Ende in haerre vlamme en sal die gherechtige niet verbarnen:

27

die den here laten sullen in haer vallen. Ende si sal hem luden bernen ende niet worden wtghedaen: ende si sal in hem worden ghesent als een lyebaert. ende si salse quetsen als een lupaert.

28

Vertuyne dijn oren mit doornen. ende en wil niet horen die quade tonghen: ende make een dore tot dinen monde: ende sloten tot dinen oren.

29

Smelte dijn gout ende dijn siluer. ende make een waghe dinen woerden: ende rechte breidel dinen monde:

30

ende wachte di dattu machschien niet en valtste in dinen tonghe. ende dattu dan valtste inden aenscouwen dijnre vianden die dij verraden willen: ende dat dijn val dan sij ongheneselijc in die doot.