Bible in duytsche (Delftse bijbel 1477)

§ Ca .xxvij

1

WEel luden hebben misdaen om armoede: ende die soect rijc te worden hi keert sijn oghen of.

2

Ghelijc datmen in die middewaert der vergaderinghe van stenen enen stake steect: aldus salmen in die middewaert van copen ende vercopen ghemoet worden mit sonden.

3

Want mitten genen die misdoet sal die misdaet vertreden worden.

4

En houtstu di niet naerstelijc in des heren vrese: so sal haestelijc dijn huus auerecht gheworpen worden.

5

Ghelijc dat in dat doergaten vanden zeue dat meel blijft: also is eens menschen moeynisse in sinen gepense

6

Eens pottemakers vat proeft den ouen: ende die gherechtighe menschen temptacie ende liden.

7

Ghelijc dat ruheit van houte sijn vrucht toecht: also dat ghepens dat woort in des menschen herte

8

Voer die reden en prijs den man niet want dit is der menschen becoringhe

9

Volghestu die gherechticheit so sultstuse begripen. ende du sultstese andoen als een behaghel cleet der eeren: ende du sultste mit haer wonen. ende hi sal dij ewelijc beschermen: ende inden daghe der bekennisse sultstu vasticheit vinden.

10

Die voghelen vergaderden tot dien die hem ghelijc sijn: ende die waerheit sal wederkeren tot den ghenen diese doen

11

Die libaert soect altoes om te vaen: ende also doen die sonden den ghenen die quaet doet

12

Die heilighe mensche gheduert in wijsheit als die sonne: want die sot verwandelt als die mane.

13

In die middewaert vanden onvroeden luden houde dat woort tot sijnen tiden: ende wes eenpaerlijc int midden der gheenre die gods wet pensen.

14

Der sondaren vertellen is te haten: ende haer ghelachen in misdaden der sonden.

15

Een sprake veel zwerende doet thaer vanden hoefde opstaen van anxte: ende haer onwaer-

[p. *311]

dicheit is een verstoppen der oren.

16[27:17]

Die ondect sijns vrients verholentheit hi sal trouwen verliesen: ende hi en sal den vrient niet vinden tot sijnen wille

17[27:16]

Wtstortinghe van bluede is inder houerdigher geschelt: ende haer vloec is zwaer te horen.

18

Minne dinen naesten ende worde mit trouwen mit hem gheuoghet

19

Ist dattu ondeckes sijn heymelijcheit so en sultstu hem niet nauolghen.

20

Ghelijc een mensche die sijnen vrient verliest: also is die verliest die vrientscap van sinen euen kersten.

21

Ende ghelijc die enen voghel laet vlieghen wt sijnre hant: also bistu die lates dinen naesten: ende du en sultsten niet vaen.

22

Volcht hem niet: want hi is verre wech Want hij is gheuloghen als een ree vten stricke: want sijn siel is ghewont.

23

Ouer hem en sultstu niet moghen toebinden: ende den vermalediden is eendrachticheit.

24

Want dat ondecken eens vrients heymelijcheit is wanhope eenre onsaligher zielen.

25

Die wenct mitten oghen hi werct ongherechticheit: ende nyemant en sallen of werpen.

26

Inden aenscouwen dijnre oghen sal hi sijnen mont versueten: ende op dine redenen sal hi verwonderen. Mer ten lesten sal hi sijnen mont verkeren: ende in dinen woerden sal hi scande gheuen.

27

Ic hebbe veel ghehoert ende ic en ghelike hem niet: ende die here sallen haten.

28

Die int hoghe werpen den steen. hi sal vallen op sijn hoeft: ende ene lose wonde sal lose wonden delen.

29

Ende die ene gracht graeft hi salre in vallen: ende die sijn naesten enen steen set hi salre hem an stoten ende die den anderen een stric leit hi salre in verderuen

30

Die gene die den scalcsten raet maect hi sal worden op hem ghekeert: ende hi en salt niet bekennen van waen hi hem toe ceomt.

31

Dat bespotten ende dat verwiten vanden houerdigen ende die wrake: sal van hem vlien als een leeu.

32

Si sullen mitten stricke vergaen die ghenoechte hebben inder gherechtigher val: want die rouwe salse verteren eer si steruen sullen.

33

Gramscap ende toren beide sijn si te veronwaerden ende een man een sondaer sal die onthouden.