Bible in duytsche (Delftse bijbel 1477)

§ Capittel .xxvi.

1

SAlich is die man eens guets wijfs want dat ghetal van haren iaren is twevoudich.

2

Een starc wijf is ghenoechtelijc haren man: ende si sal die iaren sijns leuens in vreden voldoen.

3

Een guet deel is een guet wijf: si sal worden ghegeuen enen man ouer guede werken in enen gueden dele der gheenre die gode ontsien.

4

Want dat guede herte is eens rijcs ende eens arms menschen: in allen tide is haer aensicht blide.

5

Van drien dinghen ontsach mijn herte: ende int vierde vreesde hem mijn aensichte

6

Die verradenisse eenre stat. ende vergaderinghe des volcs.

7

ende loghenachtige ouerdaet: alle sijn si swaer bouen die doot.

8

Rouwe van herten ende gheween is een wantrouwel wijf.

9

In een wantrouwe wijf is die gheesel der tongen: haer alle menschen delende.

10

Ghelijc een guet iock dat ruert: alsoe is een scalc wijf: diese hout. is als een die een scorpioen begrijpt.

11

Een dronckenachtich wijf is grote gramscap: ende lachter ende haer vuylheit en sal niet bedect worden.

12

Eens wijfs onkuyschs leuen is in die hoechdraghentheit haerre oghen. Ende in horen wintbraeuwen salmense bekennen.

13

In een dochter die haer niet of en keert: versekert die huede: dat si geen oersake en vinde ende haers misbruke.

14

Wachte di van alre oneersaemheit haerre oghen: ende en verwondere di niet al verrokeloesdese di.

15

Ghelijc dat een dorstich gangher sijn mont opdoen sal ter fonteynen: ende van elken naesten water drincken sal: ende teghen elke stake sitten: ende

[p. *310]

tegen elcke gescut sine koker opdoen sal tot dat hi onmachtich wort.

16

Eens naerstichs wijfs gracie sal haren man ghenoechte gheuen: ende sal sijn beenre besaluen.

17

Haer ghemaniertheit is die gaue gods.

18

Een welghemaniert wijf ende een zwighende: en is gheen verwandelen der gheleerder zielen.

19

Gracie bouen gracie is een heilich wijf ende scamel.

20

Want alle zwaerheit en is niet waerdich eenre menschen reynhoudender zielen.

21

Ghelijc der risender sonnen inder werlt in gods hoechsten: alsoe is eens guets wijfs schoenheit in vercieringhe haers huus.

22

Een lichtuat lichtende opten heilighen candelaer: ende schoenheit des aensichts op ghestade outheit.

23

Gulden columpmen op silueren voeten: ende vaste voeten op eens gestadichs wijfs plante.

24

Het sijn ewelike fundamenten op enen ghehelen steen: ende gods gheboden in eens heylichs wijfs herte.

25

In tween dinghen soe is mijn herte besericht. ende int derde is mi gramscap an gecomen.

26

Een man vechter die te nyete gaet bi armoede ende een wijs man versmaet.

27

ende die ouergaet van gerechticheden tot sonden die heeft god bereet ten zwaerde.

28

Twe ghedaenten duncken mi pijne ende vreseachtich mit pijnen doen een comenscap wt sijn rokeloesheit ende een bedriegher en sal niet gherechtich worden vanden sonden sijnre lippen