Bible in duytsche (Delftse bijbel 1477)

§ Ca .xxv

1

IN drien dinghen is mijn gheest ghenoechlijc: die gheproeft sijn voer gode ende den menschen.

2

Bruederen eendrachticheit: ende minne des naesten ende man ende wijf wel ouer een draghende.

3

Drie manieren haet mine ziele ende ic worde sere verzwaert haerre zielen

4

Enen armen houerdighen. enen riken loghenachtich. ende enen ouden sot ende onghesint.

5

Dattu in dijnre ioncheit niet vergadert en hebste: hoe sultstu dat vinden in dijnre outheit?

6

Hoe schone is den ouden graewen dat vonnisse: ende den priesteren te kennen den raet.

7

Hoe schoen is die wijsheit den ouden: ende dat verstant ende den raet is den gloriosen.

8

Der ouder crone is veel wetenheit: ende haer glorie is die vrese gods.

9

Neghen ongepensde dinghen der herten vonniste ic groot: ende dat thiende sal ic den menschen segghen inder tonghen.

10

Een man die leuende verblijt in sijnen kinderen ende die siet die omwerping sijnre vianden.

11

Salich is hi die woent mit enen welghesinden wiue: ende die in sijn tonghe niet gheuallen en is: ende die niet gedient en heuet den ghenen die sijns onwaerdich waren

12

Salich is die man die vint enen ghewarighen vrient: ende die gherechticheit vertellet eenre oren die hoert.

13

Hoe groot is hi die vint wijsheit ende wetenheit: ende gheen en is bouen den ghenen die den here ontsiet.

14

Gods vreese heeft hi bouen alle dinc gheset

15

Salich is die man: dien ghegheuen is die vrese gods te hebben. Die die vrese gods hout wien salmen ghelijc maken?

16

Gods vreese is tbeghinsel sijnre minnen: want dat beghinsel der trouwen is hem ancleuende

17

Alrehande plaghe is hem droefheit der herten: ende alle quaetheit is eens wijfs salicheit.

18

Ende hi sal sien alle wonden. ende niet wonden der herten:

19

ende alle scalcheit en is niet bide scalcheit des

[p. *309]

wijfs:

20

ende alle heymelijcheit ende niet heymelijcheit der gheenre die haten:

21

ende alle wrake ende niet wrake der vianden.

22

Gheen hoeft en is scalcker dan der slanghen hoeft:

23

ende gheen gramscap en is bouen des wijfs gramscap. Het sal meer ghenoghen te wonen mit enen libaert ende mit enen drake: dan te wonen mit enen scalcken wiue.

24

Eens wijfs scalcheit verwandelt haer aensicht: ende si sal verblinden haer aensicht als een beer: ende si toghet als een sac int midden haer naeste.

25

Haer man versuchte ende horende versuchte si een luttelkijn

26

Cort is alle quaetheit bouen eens wijfs quaetheit der sondaren loth sal op haer vallen.

27

Ghelijc dat een sandighe opganc is in eens oudmans voete: alsoe is een clappende wijf enen rusteliken man

28

En ansigh niet eens wijfs schoenheit ende en begheer gheen wijf in haer schoenheden.

29

Eens wijfs gramscap ende onwaerdicheit is groot scande.

30

Heeft een wijf die voerdeelder hant: so is si haren man contrari.

31

Een oetmoedich herte: ende een zerich aensicht ende een doot wonde. is een scalc wijf.

32

Crancke handen ende onmachtighe knyen: is een wijf die haren man niet en prijst.

33

Dat beghinsel der sonde wort vanden wiue ende bi haer steruen wi alle.

34

En ghif dinen water ghenen wtganc noch clenen: noch quaden wiuen ghenade wt te gaen

35

En wandertse niet na dijnre hant: soe salse di schelden in dijnre vianden aenscouwinghe.

36

snijtse of van dijnen vleysche: datse di altoes niet en misbruke.