Bible in duytsche (Delftse bijbel 1477)

§ Ca .xxiiij

1

DIe wijsheit sal haer zielen louen: ende si sal in god worden gheeert. Ende si sal glorieren int midden den volke:

2

ende in des alren hoochsten vergaderinge sal hi haer mont opdoen Ende si sal glorieren inden aenscouwen sijnre duecht:

3

si sal worden verheuen int midden van sijnen volke. Ende men salse verwonderen in heyligher volheit

4

ende sij sal lof hebben inder menichten vanden wtuercoren: ende onder die ghebenedide salmense ghebenedien segghende.

5

Ic bin wtgecomen wt des alre ouersten monde: eerstgheboren voer alle creaturen.

6

Ic dede inden hemelen dat dat onghebreckelike licht wassen soude: ende als een neuel heb ic alle vleysch bedect.

7

Ic woende inden hoochsten: ende

[p. *307]

minen throne was inden calumpnen der wolken.

8

Den rinc vanden hemel heb ic allene omme gegaen. ende ic heb doerleden die diepheden vanden afgronden: ende ic heb ghewandert in die vlueden der zee:

9

ende in allen lande heb ic ghestaen

10

Ende ic heb die voerbaricheit ghehadt in alle volc ende in allen luden:

11

ende alle der houaerdigher ende der oetmoediger herten heb ic mit machte vertreden. Ende in al desen socht ic ruste: ende ic sal wonen in des heren erffachticheit.

12

Doe gheboot ende seide mi die scepper alre dinghen: ende die mi sciep rustede in mijn tabernakel:

13

ende hi seide mi Wone in iacob: ende ic heb erue in israhel: ende in minen wtuercoren schiete wortelen.

14

Vanden beghinne voer die werlt bin ic ghescepen: ende totter toecomender werlt en sal ic niet ghebreken: ende ic hebbe ghedient voer hem inder heiligher woninghe.

15

Ende in syon bin ic dus ghestarct: ende gelikelijc heb ic gheheylicht gerust inder stat: ende in iherusalem is mijn macht

16

Ende ic hebbe ghescote wortelen in gheeersaemt volc. ende haer erue is inden deel mijns gods: ende inder menichten vanden heilighen so is mine ghedenckenisse.

17

Ic bin verheuen als cedar in lybano: ende als die cypresse inden berghe van syon.

18

Ende als die plantinghe vander rose in iherico. Ic bin verheuen als een palm in cades.

19

Als die speciose olyueboem inden velde. ic bin verheuen als een platanus neuens den watere inden straten.

20

Ghelijc caneel ende balsom welrukende so gaf ic roke: als wtuercoren mirre gaf ic roke der sueticheit.

21

Ende als storax ende galbanus. ende naghele ende dropele: ende als een onghehouwen libanus so beroecte ic mine woninghe: mijn roke is als balsame die niet ghemenghet en is.

22

Ic hebbe mijn telgheren wt gestrect als een therebinthus ende mijn telgheren sijn der eren ende gracie

23

Gelijc den wijngaert heb ic vrucht ghemaect ene sueticheit van roken: ende mine blomen sijn vrucht der eeren ende der eersaemheit.

24

Ic ben moeder der schoenre minnen. ende der vresen. ende der bekennissen. ende der heiligher hopen.

25

In mi is gracie alre weghen ende alre waerheit: in mij is alle die hope des leuens ende der duecht.

26

Lidet ouer tot mi alle die mi begheert: ende veruolt van mijnen gheslachte.

27

Want mijn gheest is suet bouen honich: ende mijn erfachticheit bouen dat honich ende die honichroten:

28

mijn ghedenken is inden gheslachte der ewicheit.

29

Die mi ete hem sal noch hongheren: ende die mi drincken hem sal noch dorsten

30

Die mi hoert en sal niet worden bescaemt: ende die in mi werken en sullen niet sondighen:

31

ende die mi verlichten. sullen dat ewighe leuen hebben.

32

Alle dit is die boec des leuens: ende des alren hoochsten testament ende die bekenninghe der waerheit.

33

Moyses gheboet een wet inden gheboden der gherechticheit: ende erfachticheit iacobs huse ende israhels belofte.

34

Hi sette dauid tot sijnen kinde ende verwecte wt hem een coninc die ewelijc alte starc sitten soude inden troon der eren.

35

Die die wijsheit veruolt als phison: ende als tygris inden

[p. *308]

daghe der nyewer vruchten.

36

Die den sin veruolt als eufraten: die menichvoudicht als die iordane inden tide des ouxtes:

37

Die disciplijn sent als dat licht: ende bi staet als gyon inden dage dat men den wijngaert leest.

38

Die eerst voldoet die wijsheit te weten: ende een crancker en salse niet ondersoeken.

39

Want van der zee vloeyede sijn ghepens ouer. ende sijn raet van veel afgronden.

40

Ic die wijsheit storte die riuieren wt:

41

ic ben als een wech van groten water wt eenre riuieren. Ic bin als als die riuier dorix: ende als een water conduut quam ic vten paradise.

42

Ic seide ic sal veruerschen minen hof vanden planten: ende ic sal veruollen die vrucht mijnre dracht.

43

En sich mij is ghemaect ene beke oueruloeyende: ende mine riuiere naecte der zee.

44

Want ic verlichte allen menschen die leringhe als die dagheraet. ende ic salse vertellen tot in langhen tiden.

45

Ic sal doergaen alle dat onderste deel vander aerden: ende ic sal besien alle die slapen: ende ic sal verlichten alle die ghene die inden here hopen

46

Noch sal ic leringe wtstortten als prophecie: ende ic salse laten den genen die wijsheit soken: ende ic en sal niet eynden in haren gheslachten tot in die heylige ewicheit.

47

Siet dat ic mi niet allene ghearbeit en hebbe. mer hem allen die daer waerheit soken.