Bible in duytsche (Delftse bijbel 1477)

§ Ca .xxiij.

1

HEre vader ende die here biste mijns leuens. en laet mij niet in haren rade: noch en laet mi niet vallen in die onwaerdicheit.

2

Wie sal mijn ghepensen die gheesselinghe onderlegghen ende in mijn herte die leringhe der wijsheit. dat hi mi niet en spare van haren onwetenheden: ende dat haer misdaden niet en openbaren.

3

ende dat mijn onwetenheden niet toe en wassen ende dat mine misdaden niet en worden ghemenichfoudighet ende dat mijn sonden niet en ouervloeyen: ende dat ic niet en moet vallen inden aenscouwen mijnre wedersaken. ende dat mijn viant niet en moet verblijden?

4

Heer vader ende god mijns leuens en laet mi niet in haer ghepens

5

verheffinghe. Van mijnen oghen en gheeft mi niet. ende alle quade begheerte kere van mij.

6

Doe van mi die begheerte vanden lichaem: ende die slapinghe vander vuylre begeerte en moet mi niet begripen: ende eenre onscamelre ende sotter zielen en leuere mi niet.

7

Kinder hoert des monts leringhe: ende diese wacht en sal niet veruaren in sijnen lippen: noch hi en sal inden alren quaetsten werken niet worden ghescandalizeert.

8

Die sondaer sal worden begrepen in sijn ydelheit: ende die houerdighe ende die vloker sal daer in worden ghescandalizeert.

9

Dijn mont en wenne hem niet ten ede: want daer is veel valsch in

10

Mer gods name en si niet eenpaerlijc in dinen mont: mitter heiligher namen en worde niet toeghemenghet: want du en sultste van hem niet onbesmet sijn.

11

Want ghelijc dat een knecht die men eenpaerlijc vraghet van beniden niet en wort ghemindert: alsoe en sal elc swerer ende nomer mit allen vander sonderen niet worden gesuuert.

12

Een man die veel zweert hi sal worden veruolt mit veel quaetheden: ende die plaghe en sal van sijnen huse niet wech gaen.

13

Ist dat hi sinen brueder bedriecht. soe sal die misdaet op hem sijn. Ist dat hijt venst. soe sal hi tweuoudelijc misdoen

14

Ist dat hij ydelijc zweert. so en sal hij niet worden gherechtich. Want mitten alren quaetsten loon sal sijn huus worden veruolt.

15

Een ander sprake is oec der doot contrarie: si en moet niet worden geuonden in iacobs erue.

16

Want vanden ontfermighen luden sullen alle dese dinghen worden ghenomen: ende en sullen gheen wentelen hebben in misdaden.

17

Dijn mont en wenne niet tot onghemanierlike sprake. Want daer is dat woert der sonden in.

18

Ghedencke dijns vaders ende dijnre moeder: want du biste int midden vanden voerbarighen:

19

dat god licht dijns niet en verghete in haer aenscouwen: ende dattu dan versottes. mit dijnre eenpaerheit niet en moetes ghedoghen lachter. ende dattu dan lieuer hadste dattu niet en waerts gheboren. ende dattu dan vloecste den dach dijrre gheboerten.

20

Een mensche die gewoen is inden woerden des verwijts: hi en sal in allen sijnen daghen niet worden gheleert.

21

Twe

[p. *306]

geslachten oueruloeyen in sonden: ende dat derde brenghet gramscap ende verlies toe.

22

Ene hete ziele is een barnende vier: si en sal niet ghebluscht worden voer dat si iet verslinden sal:

23

ende een scalc mensche inden mont sijns vleysches. hi en sal niet ophouden voer dat hi een vier ontsteken sal.

24

Een mensche van onkuysschen leuen is alle broot suet: hi en sal niet moede worden ouerlidende van sijnen misdaden tottten eynde

25

Elc mensch die sijn bedde ouergaet versmadende in sine ziele. ende seit wie siet mi:

26

die duusternissen sijn omtrent mi ende die wanden bedecken mi ende nyemant en siet mi wie ontsie ic: die alre hoochste en sal mijnre misdaden niet ghedencken:

27

ende hi en verstaet niet dat sijn oghen alle dinc sien: want hi versteect hem van gods vrese. Sulkes menschen is vrese ende der menschen oghen die dien ontsien:

28

ende en bekent niet dat des heren oghen veel claerre sijn dan die sonne ende dat si alle der menschen weghen bescouwen. ende dat diepe vanden afgront ende der menschen herte siende inder verborghen steden.

29

Want den here god waren alle dinghen kondich eer si worden ghescepen: ende dus aensach hi alle dinc na dat si volmaect sijn.

30

Dese mensche sal worden ghecastiet inden straten vander stat: als hi sal worden veriaghet als een meryen voelen: ende daer hijs niet wanen en sal. daer sal hi worden begrepen.

31

Ende hi sal alle menschen in lachter wesen: om dat hi gods vrese niet en heeft verstaen.

32

Dus sal oeck elc wijf sondighen die haren man laet: ende die erfachticheden set van vreemden huwelicken.

33

Want ten eersten was si onghelouich in des alren hoochsten wet: ende ten anderen heeft si haren man ghelaten ende ten dorden heeft si onkuyscheit ghedaen ende ouerspil. ende van enen anderen heeft si tot haren behoef kinderen gheset.

34

Dese salmen brenghen inder vergaderinghe: ende men salse in haren sonen bescouwen.

35

Ende haer sonen en sullen gheen wortelen leueren: ende haer telghen en sullen gheen vrucht gheuen.

36

Si sullen haer ghedencken laten in vermaledijtheit: ende haer scande en sal niet worden ofghedaen.

37

Ende die ghene die ghelaten sijn sullen bekennen. dat niet beter en is dan gods vrese: ende niet zueter en is dan in des heren gheboden te scouwen

38

den here te volghen is grote glorie: want men sal ontfaen van hem lancheit van daghen