Bible in duytsche (Delftse bijbel 1477)

§ Ca .xxij

1

IN enen modderachtigen steen sal die traghe ghesteent werden: ende alle luden sullen spreken op sijn veronwaerdicheit.

2

Vanden ossen missche is die traghe ghesteent: ende elc dien ghenaect sal sijn handen scudden.

3

Des vaders scaemte is van enen onbescheiden soon: mer in eenre sotter dochter sal hi worden in verminderinghe.

4

Een vroede dochter is haer man een erfachticheit: want die ghene die haer bescaemt. wort in lachter haren vader.

5

Die boude bescaemt den vader ende haren man. ende si en sal niet worden ghemindert den nydighen: mer van beiden sal hi worden onteersaemt.

6

Die sanc inder weninghe is ene ontamelike vertellinghe: gheeselle ende leringhe is in alre tijt wijsheit.

7

Die den sotten leert: is als die ghene

[p. *304]

die een scerf vergadert.

8

Die dat woort vertelt den ghenen dies niet en hoert: hi is als die gene die enen slapende wect van enen swaren slaep.

9

Hi spreket mit enen slapenden die den sotten wijsheit vertelt: ende int eynde vander vertellinge so seit hi. Wie is dese.

10

Wene opten doden. want sijn licht ghebrect: ende screyt op den sotte: want hem gebrect van sinnen.

11

Luttel wene op enen doden want hi is gherust.

12

Alte quaet is dat alre quaeste leuen bouen eens sots doot

13

Een doden gheween dats seuen daghen mer eens sots ende eens nydichs beween is alle die daghen haers leuens

14

En spreec niet veel mitten sotten: ende mitten onwisen en ganc niet vele:

15

Wachte di van hem datstu gheen onwille en hebste: ende en besmette di niet in sijnen sonden.

16

Neyghe van hem ende du sultste ruste vinden: ende du en sultste niet worden vertraghet in sijnre sotheit.

17

Hi sal worden verzwaert bouen loot. Ende wat namen is hem anders dan sot?

18

Sant ende sout. ende een hoop ysers is lichter te dragen: dan enen onwisen mensche ende sot ende nydich.

19

Gelijc dat een fundament van houten palen te gader gheuoecht in een fundament van enen ghestichte niet en sal worden ghescheiden: also en mach oec dat herte dat vast ghemaect is inder raets ghepens.

20

Eens wijs ghepens en sal in gheenre tijt worden verarghet of in vresen.

21

Ghelijc dat stroe inden hoghen: ende moerter sonder wtlegghen ghescict. niet en sullen duren teghen dat aensicht vanden winde:

22

alsoe en sal gheen vresende herte in des sots ghepensen niet wederstaen teghen dat bedruusch van vresen.

23

Ghelijc eenre sandigher vercieringhe in enen effenen wech alsoe en sal in allen tijt die vresende herte in des sots ghepens niet ontsien: alsoe oec die altoes gheduren in gods geboden.

24

Die die oghen duwet hi brenghet die tranen wt: ende die prekelt dat herte hi brenghet den sin dan voert.

25

Die enen steen werpt in die voghelen hi salse veriaghen. alsoe die ghene die verwijt teghen enen vrient die breect die vrientscap.

26

Ist datstu tot enen vrient dat zwaer wt trecste en mishope niet. want het is een wederkeren totten vrient.

27

ist dathi sinen mont zeerichlic op doet ontsieten niet: want den vrient is een wederdencken: wtghenomen inder misdaeet van lachter ende verwiten ende inder houerdyen. ende inder openbaringhe der heymelijcheit ende in eenre boser wonde. In al desen sal die vrient ontvlien.

28

Besit trouwe mitten naesten in sijnre armoede: ende du sultste worden verblijt in sinen gueden.

29

Inden tide sijns lidens gheduer hem ghetrouwe: dat du moghes erfghenoot sijn in sijnre erfachticheit.

30

Voer dat vier van enen vernayse sal die hette ende die roec vanden vier opgaen: also sullen oec voer dat bluet vloken ende lachter ende dreyghinge sijn.

31

En scame di niet den vrient te grueten. Ende en verberge di niet van sijnen aenschijn: ende al dat di quaet comt du sultstet bi hem gedoghen.

32

Elc diet sal horen. sal hem van hem wachten.

33

Wie sal minen mon-

[p. *305]

de hoede gheuen. ende op mijn lippen een seker teyken: dat ic van hem niet en valle. ende dat mijn tonghe niet en verliese?