Bible in duytsche (Delftse bijbel 1477)

§ Capit .xix.

1

EEn dronckenachtich arbeider en sat niet rike worden: ende die cleyne dinghen versmaet hi sal allencken neder vallen.

2

Die wijn ende die wiuen doen die wijse achterwaert staen of dwalen ende si sullen die vroede berispen:

3

ende die hem mitten onsuueren voghen si sullen scalc wesen. Vulicheit oude wormen sullen di ter erfnis ontfaen: ende si sullen worden verheuen in meerre exempel. ende sijn ziel sal worden ghenomen vanden ghetale.

4

Die haestelijc gheloeft hi is van lichter herten ende hi sal worden gheminret: ende die misdoet teghen sijn ziel hier ouer salmen hebben.

5

Die om die quaetheit verblijt men sallen merken. ende diet berispen haet. sijn leuen sal worden gheminret: ende die clappinge haet. hi duet wt die quaetheit.

6

Die in sijn ziel sondicht hij sal penitencie doen: ende die verblijt in quaetheden men sallen merken

7

En verander niet een scalc woert ende hart: ende du en sultse niet worden verminret.

8

Den vrient ende den viant en wil dijn sin niet vertellen: ende ist datti misdaen is. soe en witls niet ondecken.

9

Want hi sal di horen ende wachten: als of hi die sonde bedecte ende sal di haten: ende soe sal hi di altoes anehanghen.

10

Hebstuut ghehoert een woert teghen dinen naesten: soe laet dat steruen in di: ende hoep dattet niet wtbreken en sal.

11

Van des woerdes aensichte ghebaert die sotte: ghelijc den suchten van eens kints dracht.

12

Ende ghelijc dat scut dat steect int vleysch vander dye: also is dat woert in des sots mont

13

Berispe den vrient. of hijs niet licht en heuet verstaen. ende dat hi dan segghe ic en hebts niet ghedaen: of ist dat hijt heeft ghedaen: dat hi daer echter niet toe en doet.

14

Berispe den naesten dat hi licht niet en segghe: ende heeft hijt gheseit dat hijt licht niet en verander.

15

Berispe dinen vrient. want dat verdienen gheschiet dicwile:

16

ende en geloeft elken woerde niet. Sulc is die valt mit sijnre tonghe: mer niet van moede.

17

Want wie ist die niet en heeft misdaen in sijnre tonghe? Berispe dinen naesten eer du hem dreyghes:

18

ende ghif stat des alren hoochsten vrese:

[p. *301]

Want alle wijsheit is gode te ontsien Ende in dien gode ontsien. Ende in alle wijsheit is die belidinge der wet.

19

Ende die wijsheit der quaetheit en is gheen disciplijn: ende die vroetscap en is des sondaers ghepens niet.

20

Het is scalcheit ende in die is onwaerdicheit: ende een onwise is ghemindert van wijsheden

21

Beter is den mensche die ghemindert wort van wijsheit. ende die des sins ghebreect inder vresen gods: dan die oueruloyet van sinne. ende des alre hoechste wet ouergaet.

22

Ene seker behendicheit is ende si is ongerecht:

23

ende sulc is die een waer woert wt seit ende vertelt die waerheit Sulke is die hem scalckelijc veroetmoedicht: ende sine binnenste sijn vol quaetheden:

24

sulc gherechtich is die hem alte seer tonder werpt van veel oetmoedicheden: sulc gherechtich is die sijn aenschijn nederheldet: ende veynst hem niet te sien hem seluen op dat hi niet en worde gheweten. Ende daer hij niet bekent en is hi sal voer dij gaen.

25

Ende is dat hem wort verboden te sondighen vander onmacht sijnre crachten: ist dat hi vint den tijt van quaetdoen hi sal quaetdoen.

26

Vanden sien bekentmen den man: ende van den teghenghemoete des aensichts soe bekentmen enen wisen.

27

Die onbehanghentheit vanden lichaem ende dat lachen vanden tanden. ende den inganc vanden mensche. si ghetughen van hem

28

Ene loghenachtighe berispinge is in eens onghenadighens gramscap: ende een oerdel ist dat ment proeft niet guet wesende: ende sulc is swighende ende hi is wijs.