Bible in duytsche (Delftse bijbel 1477)

§ Capit .xviij.

1

DIe in ewicheit leeft hi sciep alle dinc te gader. God sal alleen gherechtich worden ghehieten: ende hi blijft een onuerwonnen coninc in ewicheit.

2

Wie mach ghenoeghen te vertellen sine werken?

3

of wie heeft zijn grootheit ondersocht.

4

Wie sal vertellen die macht sijnre grooten? Ende wie salre toe doen vertellen sijn ontfermherticheit?

5

Ten is niet te minderen noch toe te doen: noch te vinden gods grootheit.

6

Als die mensche sal voldaen hebben soe sal hi beghinnen ende als hi gherust sal hebben soe sal hij werken.

7

Wat is die mensche ende welc is sijn gracie: ende wat is sijn guet. of wat is sijn scalcheit?

8

Dat getal vander menschen daghen van also veel hondert iaren: sij sijn gheacht als een dropel waters teghen der zee: ende als een ghescheiden steen vanden sande. also cleyn sijn die iaren te ghelikenen teghen den eweliken dach

9

Om dit is god ghedoechsaem in hem luden: ende hi sal op hem wtstortten sijn ontfermherticheit.

10

Ende heeft ghesien die ouerdaet van haerre herten dat sij quet is: ende hi bekent hare ommewerpinge dat si scalc is.

11

Daer om heeft hi sijn guedertierenheit in hem luden ghedaen: ende hi heeft hem getoent den wech der gherechticheit.

12

Des menschen ontfermherticheit is omtrent sijnen naesten mer des heren ontfermherticheit is bouen alle vleysch.

13

Die ontfermherticheit heeft. hi heeft geleert ende ghewijst als een herde sinen cudde.

14

Hi sal ontfermen onfaende die leringhe der ontfermicheit: ende den ghenen die haest in sinen oerdel.

15

Kint mijn in guede dinghen en sultstu ghene claghe gheuen: ende in ghenen gauen en sultstu niet gheuen sericheit van quaden woerde

16

Hoe en sal die dou die hette niet vercoelen

17

Also sal oec een woert bet dan die gifte. Sich en is dat woert niet bouen die guede gaue? Deen ende dander is mit enen gherechtighen mensche.

18

Die sotte sal sterkelijc verwiten: ende eens onghemanierts menschen gaue duet die oghen bescamen.

19

Voer dat oerdel ondersoke di gherechticheit: ende eer du sprekes lere.

20

Voer die quale doe medicine daer toe: ende voer dat oerdel vraghe di seluen: ende du sultse guedertierenheit vinden in gods aenscouwen.

21

Voer die quale veroetmoedighe di: ende inden tide der siecten tone dine wandelinge

22

Ende worde niet belet altoes te bedinghe: ende en worde niet veroudt gerechtich te worden totter doot: want gods loon blijft ewelijc.

23

Voer die bedinghe bereide dijn ziele: ende en wilt niet wesen als een mensche die gode becoert

24

Ghedenc der gramscap inden daghe des volbrenghincx: ende du sultse inder wanderinghe maken tijt der weder gheldinghe.

25

Ghedencke der armoede

[p. *300]

inden daghe der oueruloedicheit: ende die noot der armoeden inden daghe der rijcheden.

26

Van des morghens totten auont sal die tijt worden verwandelt: ende alle dese dinghen sijn vast in gods oghen.

27

Een wijs mensche ontsiet hem in allen dinghen: ende inden daghe der misdaet sal hi hem wachten van traecheden.

28

Elc vroede bekent die wijsheit: ende diese vint si sal hem belyen gheuen.

29

Die wijse inden woerden. si deden wijselijc: ende si verstonden die waerheit ende die gherechticheit: ende si onderuonden die woerden ende die vonnissen.

30

Na dine begheerten en ganc niet: ende van dinen wille soe kere.

31

Ist datstu dine ziele haer begeerte verleenste. soe salse di maken in dijnre vianden blijscap.

32

En hebbe gheen genoechte inden scaren: noch inden luttelen. Want haer sendighen is eenpaerlic.

33

En wes niet middelbaer inder scheldinghe van wokenaers: ende niet en is di niet in die werelt. Want du sultste noch sijn nydich dijns leuens