Bible in duytsche (Delftse bijbel 1477)

[p. *298]

Ca .xvij

1

GOd sciep die mensche vander aerden: ende na sijnen beelde maecte hi hem:

2

Ende echter heeft hi hem weder ter aerden ghekeert: ende na hem seluen clede hi hem mit duechden.

3

Dat ghetal vanden daghen gaf hi hem ende tijt: ende hi gaf hem macht van dien dinghen die opter aerden sijn.

4

Hi settede des menschen vrese bouen allen vleysch: ende hi heeft heerscappie bouen die beesten ende den voghelen.

5

Hi sciep vten mensche een hulpe hem ghelijc: ende gaf hem raet ende tonghe oghen ende oren. ende hi gaf hem dat herte te voerpensen: ende hi veruolde die mit disciplijnen der verstandenisse.

6

Hi sciep hem des gheests const: ende mit sinne veruolde hi haer herten: ende guet ende quaet thoende hi hem.

7

Ende hi sette haer oghen bouen haer herte. hi thoende hem die grootheit van sinen werken

8

om dat si sullen louen den name der heilicheit: ende glorieren in sinen wonderen: om dat si sullen vertellen die grootheit van sinen werken.

9

Hi deder hem disciplijn toe: ende hi maectese erfachtich in die wet des leuens.

10

Een ewich testament settede hi mit hem: sijn gherechticheit ende sijn oerdel toende hij hem.

11

Ende die groetheit sijnre eren saghen haer oghen: ende die ere hare stemmen hoerde haer oren: ende hi seide hem Wachte di van allen ongherechte.

12

Ende hi gheboet die. elken van sinen naesten sinen wech te hoeden.

13

Haer weghen sijn voer hem altoes: si en sijn niet verborghen van sinen oghen.

14

In enen ygeliken van sinen luden settede bi enen regeerre:

15

ende gods van ysrahels deel is openbaer ghemaect.

16

Ende alle haer werken sijn in sijnen aenscouwen ghelijc der sonnen. ende sijn oghen aenscouwen sonder oflaten in haren weghen.

17

Die testamenten en sijn niet verburghen bi haren quaet. ende alle haer quaetheden sijn in gods aenscouwen

18

Eens mans aelmisse is als een sac mit hem: ende des menschen gracie behoudende als die appel sijn oghe.

19

Ende daer na sal hi opstaen ende sal hem weder ghelden den loon een yghelijc in haer hoeft ende hi sal wederkeren inden nedersten delen vanden lande.

20

Ende den ghenen die penitencie doen heeft hij ghegheuen den wech der gherechticheit: ende hij stercket tot liden die ghebrekende: ende heeft hem ghesent dat loth der waerheit.

21

Worde ghekeert totten here ende laet dijn sonden:

22

bidde voer gods aensichte: ende mindere die verbelghinge

23

Bekeer totten here. ende worde bekeert van dijnre ongherechticheitende alte seer hatet hi onwaerdicheit .

24

ende bekenne gods gherechticheit ende sijn oerdel: ende stae inden lote der voersettinghe ende der bedinghe des alren ouersten gods

25

Ganc inden dele der heiligher werelt: mitten leuenden die gode belien gheuen

26

Du en sultste niet geduren inder dwalinghe vanden quaden: biecht voer die doot. Want na die doot veruaert die biecht als niet.

27

Du sultste leuende biechten: leuende ende ghesont sultstu biechten ende gode louen: ende du sultste verblijden in sine ontfermherticheit

28

Hoe groot is gods ontfermherticheit ende sijn guedertierenheit totten ghenen die tot hem bekeren.

29

Want alle dingen

[p. *299]

en moghen niet inden mensche sijn: want des menschen kint en is niet ontsterflijc ende si ghenoechden inder ydelheit van quaetheden.

30

Wat is claerre dan die sonne? Ende si sal ghebreken. Of wat is quader. dan dat vleysch ende bluet heeft ghepenst? Ende dat sal worden berispt

31

Hi bescouwet die macht van des hemels hoocheit: ende alle menschen sijn aerde ende asschen