Bible in duytsche (Delftse bijbel 1477)

§ Capittel .xvi.

1

EN verblide niet in quaden kinderen. al ist dat si worden gemenichfoudicht: ende en heb gheeu ghenoecht in hem. ist dat gods vrese mit hem niet en is.

2

En gheloeue haer leuen niet: ende en aenscouwe in haer pijne niet.

3

Want beter is een die gode ontsiet: dan dusent nydighe kinderen.

4

Ende tis beter sonder kinder te steruen: dan nydighe kinderen achter te laten.

5

Van enen wijsen man salmen int lant wonen ende het sal worden ghelaten van drie nydighen.

6

Mijn oghe heeft ghesien veeldustanighe dinghen: ende sterker dan

[p. *297]

desen heeft mijn ore ghehoert.

7

Inder sondaren synagoghen sal vier barnen: ende gramscap sal ontsteken in onghelouighen luden.

8

Die oude giganten en baden niet voer haer sonden. Die welke destrueerden hopende in haer cracht:

9

hi en spaerde haer pelgrimagie niet mer hi sloechse: ende hi veronwaerdese op die houaerdie van haren woerde

10

Hi en ontfermde niet al dat volc verderuende: die hem verhieuen in haren sonden.

11

Ende ghelijc ses hondert dusent mannen te voet die vergadert sijn in die herdicheit haers herten: ende ofter een houaerdich hadde gheweest. soe waert wonder hadde hi onbesmet gheweest.

12

Want ontfermicheit ende gramscap is mit hem: mahtich bedinghe ende wtstorttende gramscap.

13

Na sijnre ontfermicheit. dus is sijn berispen. den mensche oerdelende na sinen werken

14

Die sondaer en sal niet ontulien inden roue: ende dat verdragen den ghenen die ontfermhertich duet en sal niet merren.

15

Alle ontfermherticheit sal elken stat maken na die verdienten sijnre werken: ende nader verstandenisse sijnre pelgrimage.

16

En segt niet Ic sal van gode worden verborghen: ende wie sal mijns ghedencken vanden hoechsten?

17

Ic en sal niet worden bekent in een groot volc. Want wat is mijn ziel in dus ontelliken creaturen?

18

Sich den hemel ende die hemel der hemele. die afgront ende al dat lant ende al datter in is sullen worden beruert in sinen aenscouwen:

19

die berghen te gader ende die houelen ende die fondamenten der aerden: als god dese dinghen sal bescouwen soe sullen si mit vresen worden gestoten.

20

Ende in al desen so is dat herte versot: ende elc herte wort van hem verstaen:

21

ende wie verstaet sine weghen? Ende die goluen die oec nie des menschen oghen en sach

22

Want veel sijnre werken sijn inder verborghentheit: mer wie sal mede voert boetscappen die werken der gherechticheit of wie salse ghedoghen? Want testament dat is verre van sulken: ende die vraghinghe van menschen is een eynde.

23

Die vermindert wort van herten hi penst sotheit: ende een onwijs man ende die doelt denct sotte dinghen

24

Kint mijn hoer ende leer die disciplijn des sins: ende verstaet in dijnre herten in mijnen woerden:

25

ende ic sal in effenheit discipline segghen. ende ic sal ondersoken ende vertellen wijsheit. ende in mine woerden verstant in dijn herte: ende ic segghe in der effenheit des gheestes. duechde die gode gheset heeft in sine werken van beghinne. ende in waerheden so boetscap ic sijn const.

26

Ende in gods oerdel. sijn werken van beghinue: ende van dier tijt dat sij menschen gheset waren soe onderscheit hij haer deel: ende haer beghin in sijnen luden.

27

Hi heeft ewelijc haer werken verchiert: noch si en hebben gheen honger ghehat noch ghepijnt: noch si en letten niet van horen werken.

28

Een yghelijc en sal sijnen naesten niet quellen tot inden eweliken.

29

En wes niet onghelouich sinen woerden.

30

Hier na sach god in die aerde: ende hi veruoldese mit sijnen guede.

31

Die ziel van elken leuende heeft gheboetscapt voer sijn aenschijn: ende si is echter der geenre wederkerringe