Bible in duytsche (Delftse bijbel 1477)

§ Ca .xv

1

DIe gode ontsiet hi sal weldoen: ende die onthoudende is den gherechtigen salse begripen:

2

ende hij sal hem te ghemoet comen als een geeerde moeder: ende si sullen ontfaen ghe-

[p. *296]

lijc enen wiue vanden maghedomme.

3

Ende si sal dien spisen mitten brode des leuens ende der verstandenissen: ende si sullen drincken mit hem water der saliger wijsheit. Ende si sal worden in hem vast ghemaect ende hij en sal niet worden gebroken:

4

ende si sullen onthouden ende hi en sal niet worden bescaemt: ende si sullen verheffen bi sinen naesten.

5

Ende int midden der vergaderinghe sal si sinen mont opdoen: ende si sullen veruollen mitten gheest der wijsheit ende der verstandenisse: ende si sullen cleden mitter stolen der glorien.

6

Ende hi sal hem vergaderen vruechde ende bliscap: ende si sullen erfachtich maken mit enen eweliken naem.

7

Die sotte menschen en sullen die wijsheit niet begripen: ende die wijse menschen sullense ontmoeten. Die sotte menschen en sullense niet sien: want si is verre van houerdien ende van quaetheden.

8

Loghenachtige mannen en sullen haers niet ghedeinckich sijn: ende ghewarighe mannen sullen worden gheuonden in haer: ende si sullen voertganc hebben tot gods aenscouwen

9

Dien lof en is niet precioes in eens sonderen mont:

10

want die wijsheit is van gode wt ghesent want van gode is volmaecte wijsheit: ende bi gods wijsheit sal die lof staen: ende hi sal oueruloeyen in eens ghetrouwen mont: ende god die regneerre sal hem lof gheuen.

11

Ende segt niet bi gode die wijsheit is wech: want dat en duet niet dat hi hatet.

12

En segt niet si heeft mij in dwalinge gebrocht: want quade menschen en sijn hem niet notorft.

13

Alle onwaerdicheit. der dwalinghe haet god: ende het en sal niet minlijc wesen den ghenen die hem ontsien.

14

Vanden beginne heeft god den mensche gheset: ende heeften ghelaten inder hant sijns raets.

15

Ende hi deder toe sine gebode die hi beuolen heeft.

16

Ist datstu wilste die gheboden houden so sullense di behouden: ende ewelijc trouwe doen ende ghenoechlijc wesen.

17

Hi heeft dij vier ende water voer gheset: steeck wt dijn hant tot dien datstu wiltste.

18

Voerden menschen is dat leuen ende die doot: guet ende quaet. Dat hem ghenoget dat sal men hem gheuen:

19

want gods wijsheit is veel ende hi is starc in machten: ende hi siet alle menschen sonder verlatinghe

20

Gods oghen sijn totten ghenen die hem ontsien: ende hi bekent alre menschen naersticheit.

21

Hi en heeft nyemant geboden nydicheit te doen: ende hi en heeft nyemant terminen ghegheuen te sondighen.

22

Hi en begheert niet die menichte van onghetrouwen ende onnutten kinderen.