Bible in duytsche (Delftse bijbel 1477)

§ Capittel .xij.

1

ISt datstu wel sultste doen. soe weet wien du wel duetste: ende veel gracien sal sijn in dijn guet.

2

Doet den gerechtighen wel. ende du sultste grote weder gheldinghe vinden: ende ist dattuse van hem nemes: soe sultstuse vanden here seker vinden.

3

Want hem en is niet wel die eenpaerlijc is inden quaden ende gheen aelmissen en gheuen: want die alre hoochste heeft die sondaren in haet: ende hi ontfermt der

[p. *293]

gheenre die penitencie doen.

4

Ghif den ontfermhertighen. ende en ontfanc den sonder niet. Ende hi sal ghelden den nydighen ende den sonders wrake: ende wachtense inden daghe der wrake

5

Ghif den goeden ende en ontfanc den sonder niet:

6

duet den oetmoedighen wel ende en gheeft den nydighen niet. Verbeide htm broot te gheuen: dat hi in dien niet machtigher en moet wesen dan du

7

Want dubbelt quaet sultstu vinden in alle tguet dat ghi ghedaen hebt in hem: want die alre hoechste heeft die sonders in hate: ende hi sal den nydighen wrake weder gheuen.

8

Den vrient en salmen niet bekennen in gueden dinghen: ende die viant en sal niet worden verburghen in quaden dinghen.

9

In eens mans guede sijn sine vianden bekent: mer in sijn sericheit ende in sijn quaetheit: so wort die vrient bekent.

10

En geloue dinen viant nemmermeer. Want sijn quaetheit verroest als een iser:

11

ende ist dat hi veroetmoedicht cromgaet so werp dinen moet of. ende wachtet dij van hem.

12

En setten niet neuens di. noch hi en sal niet sitten tot dijnre rechter hant. dat hi hem niet omme en kere ende stae in dijn stat: soe dat hi licht dijnen zetel niet en moet soken als hi omme ghekeert is in dijn stat: ende dattu dan inden vtersten moetste bekennen mijn woerden. ende dattu moetste worden ghestarct in mijn reden.

13

Wie sal den gokelaer ghenesen. die van enen serpent gesteken is: ende hem allen die vanden beesten ghenaket sijn? Also sal die ghene die gesellet is mit enen nydighen man: ende die bewonden wort in sijn sonden.

14

Hij sal mitti blijuen een vre: mer ist dattu geldes. hi en sal niet verdraghen.

15

Die viant versoetet in sinen lippen: ende leit laghen in sijn herte om dat hi di ommewerpen sal in die gracht.

16

Die viant sal wenen in sinen oghen: ende ist dat hij tijt sal vinden. so en sal hi niet worden ghesadet van bloede:

17

ist dat die quade dingen an comen. so sultstu hem daer ten eersten vinden.

18

In sinen oghen sal die viant wenen: als of hi di holpe. ende hij sal dinen planten omme grauen.

19

Hi sal sijn hoeft roeren ende mit den handen te gader slaen: ende veel dinghen runende sal hi sijn aensicht altoes verwandelen