Bible in duytsche (Delftse bijbel 1477)

§ Ca .x

1

EEn wijs rechter sal sijn volc oerdelen: ende eens princen vroetscap sal ghestadih sijn.

2

Naden rechter vanden volke. also sijn oec sijn dienres: ende also ghedaen. als die regeerre van der stat is: alsulc sijn oec die gene dier in wonen.

3

Een onwijs coninc sal sijn volc verliesen: ende men sal in steden wonen ouermits der vroeder sinnen.

4

In gods hant is die macht vanden lande: ende alder luden quaetheit is te veronwaerden: ende hi sal verwecken inder tijt bouen die stat enen oerbaerliken regeerre.

5

Der menschen macht is in gods hant: ende op eens scriben aensicht sal hi sijn ere setten.

6

En ghedenc gheen onrecht dijns naesten: ende en doe niet inden wercken sijns onrechts.

7

Die houaerde is te haten gode ende voer die menschen: ende alre luyden quaetheit is veronwaerdet.

8

Dat rijc sal ouer worden ghedraghen vanden heydenen inden heydenen: om die ongherechticheit. ende om die ondaden. ende om die scande. ende om die menigerhande quaetheden.

9

Niet en is quader dan die vercke. Wat houaerdicht in die aerde ende in die assche?

10

Niet en is ongherechter dan dat gelt te minnen. Want dese heeft sijn ziel te coep: want sijn binnenste heeft hij verworpen in sijn leuen.

11

Alle vermoghen is cort leuen: die langhe quale verzwaert den meester.

12

Ende corte quale ofsuydet die meester: also is een coninc huyden: ende morghen sterft hi.

13

Want als een mensche sal steruen: soe sal hi te erue ontfaen serpenten beesten ende wormen.

14

Dat beghin van eens menschen houaerdie is van gode verworpen:

15

want sijn herte is vanden ghenen ghegaen dien maecte: want tbeghin van alre sonden is houerdie. Die die houerdie hout hi sal veruolt worden mit maledictien ende si sullen hem auerecht werpen int eynde.

16

Hier om heeft die here veronwaert die vergaderinghe der quader: ende hi heeftse gedestrueert tot int eynde.

17

God heeft ghedestrueert der houaerdigher leidsmans zetele: ende hi dede die guedertieren sitten bouen hem.

18

God heeft verdroecht die wortelen der houaerdigher luden: ende hi heeft die oetmoedighe gheplant van dien luden

19

Der heyden lant heuet die here ommegeworpen: ende hi heeftse verdoruen totten fondamente.

20

Hi verdroechder van hem ende verstroeydese: ende hi heeft doen ophouwen haer ghedencken vanden lande.

21

God heeft der houaerdiger ghedencken verloren: ende hi heeft der oetmoedigher van sijnen ghedencken

[p. *291]

ghelaten.

22

Die houaerdie en was den mensche niet ghescepen: noch die gramscap die gheslachten van wiuen.

23

Vander menschen sade sal worden gheeert dat den here ontsiet: mer dat van des menschen sade des heren gebode ouergaet wort geoneert.

24

Int midden der kinderen bruederen so sal die regeerre van dien in eren sijn die den here ontsien. sullen in sijn oghen sijn.

25

Het is glorie der riker gheeerden luden. ende der armer is gods vrese:

26

en wil niet versmaden enen armen gherechtighen mensche: ende en verheffe niet den riken sonder.

27

Die rechter is groot ende machtich van eeren: ende nyemant en is merre dan die gode ontsiet.

28

Enen wisen knecht dienen vri: ende een wijs man gestadich hi en sal niet murmureren als hi berispt is: ende een onwetende en sal niet worden gheeert.

29

En wil di niet verheffen in dine werken te verlies: ende en wil niet twiuelen inden tide der quellingen.

30

Beter is die gene die werct ende oueruloeyt in allen dinghen: van die hem verheft ende broots deruet

31

Kint mijn houde dijn ziel in ghestadicheit: ende ghif haer eer na haren loon.

32

Die sondicht in sijn ziel wie sallen te recht oerdelen? Ende wie sallen eeren die sijn eyghen ziel onteert?

33

Die arme verblijt bi disciplinen ende bi sijnre vresen: ende sulke menschen ist die men eert van sijn guet

34

Mer die verblijft in armoede: hoe veel meer in guet? Ende die verblijt in guet: hi ontsiet armoede