Bible in duytsche (Delftse bijbel 1477)

§ Ca .ix

1

DAt wijf dijns soens en benyde niet: op dat si op di niet en tone die quaetheit der scalker leringhe.

2

En gif den wiue niet die macht dijnre zielen op dat si in dijn cracht niet en come dattu dan wortste bescaemt.

3

En aenscouwe gheen wijf van veel willen: dattu licht niet en valtste in haer stricken

4

En wes niet stadelijc mit eenre sprincster noch en hoertse niet: dattu niet lijchtelijc en vergaetste in haer werck

5

En bescouwe niet ene maghet. dattu niet lijchtelijc en wortste gheuaen in haer schoenheit.

6

En ghif in ghenen dinghen den genen die in onkuysheit leuen dijn ziele: op dattu dij seluen niet en verlieste ende dijn erfachticheit.

7

En wilt niet ommesien die weghen vander stede: dattu niet en dwaelste in haren straten.

8

Keer of dijn aenschijn van enen behagheliken wiue. ende en ommesich gheen vreemde schoenheit.

9

Want vele luden sijn veruaren om die ghedaente vanden wiuen: ende hier om ontsteect die begheerte als een vier.

10[9:12]

En sitte emmer niet mit enen vreemden wiue: noch en legt mit haer niet op een bedde:

11[9:13]

ende en stride mit haer niet inden wijn. dat lycht dijn herte in haer niet neyghen en moet: ende dattu mit dijnen bluede moechste vallen in verliese.

12[9:10]

Elc wijf die ouerspeelrinne is. si sal worden vertreden van alden ghenen die bi haer liden sullen. als eens menschen vulicheit inden wech.

13[9:11]

Veel menschen verwonderen van die ghedaente van enen vreemden wiue. si worden achterghesteken ende ghelachtert: want haer sprake ontsteect als enich vier .

14

En laet den ouden vrient niet: want een nyewe en sal hem niet ghelijc sijn.

15

Nyewe wijn ende nyewe vrient hi worde out: ende du sultsten mit suetticheit drincken.

16

En minne niet eens sondaers glorie ende sijn rijcheden: want du en weetste niet sine toecomende ommewerpinghe.

17

Der ongherechter onrecht en ghenoghe di niet: ende weet dat die quade ghenogen sal totter hellen.

18

Wes verre van enen mensche die macht heeft te doden: ende du en sultste niet duchten die vrese der doot.

19

Ist dattu tot hem gaetste soe en wil gheen dinc doen: dat hi licht dijn leuen niet en neme.

20

Wete die ghemeenscap van der doot: want du sultste ingaen int

[p. *290]

middewaert der stricken: ende opter rouwigher wapenen sultstu wanderen.

21

Nae dijn macht: wachte di van dinen naesten ende mitten vroeden ende mitten wisen tractere.

22

Gherechtige mannen sullen di sijn werscappen: ende inder vresen gods sultstu glorieren: .

23

ende inden sin sal sijn gods ghepense: ende alle dine vertellinghe in des alren hoochsten gheboden.

24

Men sal dat werc prisen inder wercluden handen ende des volcs prince inder wijsheit sijnre redenen: mer dat woert den ouden luden inden sin.

25

Een clappende mensche is veruaerlijc in sine stede: ende een ouerdadighe in sinen woerden is te haten.