Bible in duytsche (Delftse bijbel 1477)

§ Ca .viij

1

IN stride niet teghen enen machtighen mensche: dattu licht niet en valste in sinen handen

2

En schelde niet mit enen riken man: datti daer of niet weder en come enen strijt van wederpertien.

3

Dat gout ende dat siluer heeft veel luden verloren: ende heeft hem ghestrect totter coninghen herten ende keertet omme.

4

En stride niet mit enen callenden mensche: ende en vergader gheen hout in sijn vier

5

En menghe niet mit enen ongheleerden mensche: dat hi niet quaet en spreke van dinen gheslachte.

6

En versmade niet enen mensche die hem ofkeert vanden sonden: noch en verwijtse hem niet. Mer ghedenc dat wi alle in ghebreke sijn.

7

En versmade ene mensche niet in sine outheit: want van ons veroudense.

8

En wilt niet verblijden vanden doot dijns viants: ende weet dat wi alle moeten steruen: ende willen in die blijscap comen.

9

En versmade niet der vrueder priesteren vertellinghe: ende wandert in haer woerden.

10

Want van hem sultstu leren wijsheit ende leringhe ende verstandenis: ende den voerbarighen dienen sonder claghen.

11

Der ouder vertellinghe en lide di niet ouer: want si hebbent gheleert van haren vaders.

12

Want van hem sultstu leren verstandenis: ende du sultste antwoerde gheuen inden tiden van nootsaken.

13

Ende ontsteec der sondaren colen niet hem berispende: ende dattu niet en wordes ontsteken mitter vlammen viers haerre sonden

14

En stant niet teghen dat aensicht des gheens die daer lastert: op dat hi niet en moet sitten als een laghe leggher dinen monde.

15

En wilt niet te woker leenen enen sterker mensche dan du biste ist datstu hem te woker leenste soe hebstuut als verloren.

16

Gheloue niet bouen dine macht: ist dattu beloues: soe peyns als dat te betalen.

17

Du en

[p. *289]

sultse niet oerdelen teghen den rechter: want na dat recht is so oerdelt hi

18

Mitten stouten en ganc inden wech niet: dat hi licht sijn quaet niet en verzware teghen di. Want hi gaet na sijnen wille: ende du sultse te gader veruaren mit sijnre sotheit.

19

En make gheen geschelt mit enighen toernighen. mit enen stouten en ganc niet inder woestinen: want dat bluet is voer hem gherekent als niet: want daer gheen hulpe en is daer sal hi di ter neder stoten.

20

Mitten sotten en hebbe ghenen raet: want sij en moghen niet minnen dan dat hem ghenoecht.

21

Voer ene van buyten en make gheen raet: want du en wetes niet wat hi voertbrenghen sal

22

Elken mensche en openbaer dijn herte niet: dat hi di licht ghene valsche gracie in en brenghe. ende di dan verwite.