Bible in duytsche (Delftse bijbel 1477)

(2008)–Anoniem Bible in duytsche (Delftse bijbel 1477)– rechtenstatus



§ Ca .vij
1 QUade dinghen en wilt niet doen ende si en sullen di niet begripen:
2 ganc wech vanden ongherechtighen. ende die quade dinghen sullen van di ghebreken
3 Zone en saeye ghene quade dinghen inden ongherechtighen voren: ende du en sultstese niet seuenvoudich weder onxten.
4 En wil niet soken gheleide van enen mensche: noch van enen coninc den zetel des eren.
5 En oerdel di niet gherechtich voer gode. want hi is die bekenre vander herten: ende en wilt niet schinen voerden coninc wijs.
6 En wilt niet soken om te worden rechter. ten sij dattu vermoghes doer te breken die quaetheit mit cracht: dattu bi auonturen niet en moetes ontsien dies machtichs aensichte: ende dattu dan setten moetes scande in dijnre lichticheit.
7 En sondighe niet inder menichte vander stede: noch en werpe di niet int volc
8 noch du en sultste niet dubbelde sonden toebinden. Want du en sultste niet onbesmet sijn in een sonde.
9 En wil niet weemoedich sijn in dijn ziel
10 en veronwaerde niet te beden ende aelmisse te doen.
11 En seg niet inder menichten van minen ghiften sal god aenscouwen: ende als ic den hoochsten god sal offeren. so sal hi mine ghiften ontfaen.
12 En bespottet ghenen mensche in die bitterheit van sijnre zielen: want god die al omme bescouwet hi ist die vernedert ende verheft.
13 En wilt die loghen niet minnen teghen dinen brueder: noch en duetse niet teghen den vrient.
14 En wil ne ghene loghen lieghen: want haer eenpaerlijcheit en is niet guet.
15 En wilt niet clappende sijn in eenre menichten van papen: en verander dat woert niet in dine bedinghe.
16 En versmaet niet pijnlike werken: ende die rontheit die vanden alren hoechsten ghescepen is.
17 En achte di niet inder menichten vanden onghemanierden:
18 ghedencke der gramscap. want si en sal niet merren.
19 Veroetmoedighe seer dinen gheest: want die wrake van eens quaets vleyssches. is vier ende wormen
20 En wilt gheen ouerdaet doen teghens den vrient die tghelt ouer draecht: noch en versmade niet dinen alten lieuen brueder mit goude.
21 En wilt niet wech gaen van enen wise ende enen gueden wiue die du ghecreghen heblte in gods vrese: want die gracie van hare scaemte is bouen gout.
22 En quetse den knecht niet die werct in waerheden: noch den huerknaepe die sijn ziel gheuet.
23 Een vroet knecht si di gemint als dijn ziele: en ontrec hem sijn vrijheit niet: noch en laet hem niet arm.
24 Hebstu vye aenmerct die: ende ist dat si oerbaerlijc sijn soe laetse bi di blijuen.
25 Hebtstu kinder so leertse: ende breke die van haren kintsheden.
26 Hebtstu dochteren hoede haer lichaem: ende dijn blide aenschijn en tone hem niet.
27 Ghif dijn dochter ende du hebtste een groot werc gedaen: ende ghifse enen wisen man.
28 Ist dat di dijn wijf is na dine ziel soe en ver-
[pagina *288]
werpse niet: ende enen hatighen wiue en gheloef niet in al dijnre herten.
29 Eer dijnen vader: ende verghet dijnre moeder suchten niet.
30 Ende ghedencke dattu niet gheweest en hadste gheboren en hadt bi dien niet gheweest: ende gheldet dien vader als si di hebben ghegolden.
31 Ontsie gode in alle dijnre zielen: ende heilighe sine papen.
32 In alle dijnre macht minne den ghenen die di maecte: ende en laet sijn dienres niet.
33 Eer gode wt al dijnre zielen eer die priesteren: ende purgeer di mit dinen armen.
34 Ghif hem deel van primicien ende van suueringhe also di gheboden is: ende suuere di mit luttelen van dijn rokelesheden.
35 Die gaue van dinen armen ende sacrificie der heilicheit sultstu den here offeren ende te beghinne vanden heilighen:
36 ende totten armen steec dijn hant voert. dat die guedertierenheit moet worden voldaen: ende dijn benedictie.
37 ende die gracie ende der ghenaden is inden aenscouwen elcs die leeft: ende den doden en verbiede die gracie niet.
38 Ghebreke den wenende niet in troestinge: ende wander mitten screyenden.
39 En vertraghe di niet den sieken te visiteren: want daer om suldi worden vast ghemaect inder minnen.
40 In alle dine werken ghedencke dijn leste Ende nemmermeer en sultstu sondighen

Vorige Volgende

§ Ca .vij

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

Over het gehele werk

auteurs