Bible in duytsche (Delftse bijbel 1477)

§ Ca .v.

1

TOt ongherechtighe. besittinge en wilt niet merken ende en segt niet dat leuen is mi ghenoech. Want ten sal niet vorderen inden tide der wrake ende der donckerheden.

2

En volghe niet in dijnre macht die begheerten dijnre herten:

3

ende en seg niet. Hoe mochte ic: of wie sal mi tonder doen om mine werken? Want wrekende sal god wreken.

4

Segt

[p. *285]

niet Ic hebbe gesondicht: wat is mi quaets geschiet? Want die alre hoochste is een ghedoechsaem weder ghelder.

5

Vander ghenadeliker sonden wilt niet wesen sonder vrese: noch en doe gheen sonde bouen die sonde:

6

en segt niet Gods ontfermherticheit is groot hi sal ontfermen die menichfoudicheit mijnre sonden.

7

Want die ontfermicheit ende die gramscap naect haestelijc van hem: ende sijn gramscap scouwet teghen den sondaers.

8

Vertraghe niet te keren totten here: ende draghes niet ouer van daghe te daghe.

9

Want sijn gramscap sal haestelijc comen: ende hi sal verderuen inden tide der wrake

10

En wil niet alte ghierich wesen in ongherechtighe rijcheden: want sij en sullen di niet vorderen inden daghe der doot ende der wrake.

11

En winde di niet in allen winde: noch en ganc niet in elken wech. Want also proeft men den sonder die in dubbelde tonghe

12

Sijt vast in gods wech ende in dijn sin ende dijn const si in waerheit: ende dat woert des vreden ende der gherechticheit volghe.

13

Sijt sachtmoedich om gods woert te horen soe datstuut moghes verstaen: ende het sal ghewarighe antwoerde voertbrenghen mit wijsheden

14

Ist dattet di is in verstandenisse so antwoerde dinen naesten: mer ist in di niet so si dijn hant op dijn mont: dattu niet en moetes worden gheuaen. ende dattu dan mogheste worden bescaemt in een onghemaniert woert.

15

In eens wijs reden is ere ende glorie: eens onwijs tonghe is in sijn omwerpinghe.

16

Du en sultste niet heeten een runer in dijnen leuen: ende du en sultse niet worden gheuaen in dijnre tonghe ende bescaemt.

17

Want opten dief is confuus ende penitencie: ende alte quaden verslinden is op enen mit tween tonghen: ende den runaren is hatye. ende onvrientscap. ende lachter.

18

Oerdel den cleynen ende den groten gelijc