Bible in duytsche (Delftse bijbel 1477)

§ Ca .iij

1

KInder der wijsheit sijn vergaderinghe der gherechticheden: ende dese gheslachte is ghehoersaemheit ende minne.

2

Gheminde kinder hoert des vaders oerdel: ende duet alsoe dat ghi behouden moecht worden.

3

Want god heeft den vader gheeert inden kinderen: ende dat oerdel des moeders ondersokende heeft hi vast ghemaect in kinderen.

4

Die gode mint hi sal bidden voer die sonden. ende hi salre hem of wachten. ende hi sal worden ghehoert inder bedinghe vanden daghe:

5

ende ghelijc den ghenen die scat vergadert. alsoe is die ghene oec die sijnre moeder eert

6

Die sijn vader eert sal worden verblijt in kinderen: ende hi sal worden ghehoert inden daghe sijnre bedinghe

7

Die sinen vader eert hi sal te langher leuen: ende die den vader ghehoersaem is. hi sal die moeder vercoelen.

8

Die den here. ontsiet eert vader ende moeder: ende gelijc heren sal hi die gene dienen dien hebben gewonnen.

9

In werke ende in redene ende in alle gedoechsaemheit eer dinen vader.

10

dat die benedictie van gode op di moet comen: ende bliuen moet die bendictie inden vtersten.

11

Des vaders benedictie maect vast der kinder husen: inder moeder vloec ontwortelt die fundamenten

12

Verblide di niet in dijns vaders scaemte: want ten is dij ghene glorie mer confuse

13

Want eens menschen glorie is van sijns vaders ere: ende die vader sonder ere is der kinner scande.

14

Kint mijn ontfanc dijns vaders outheit. ende en spotte mit hem niet in sijn leuen:

15

ist dat hi ghebreect van sinne. so ghif hem ghenade: ende en versmaden niet in dijnre cracht Want des vaders aelmissen en sal in verghetelheden niet wesen.

16

Want voer der moeder sonde salmen di guet weder gheuen:

17

ende het sal di worden ghesticht in gherechticheden. ende men sal dijns ghedenckeu inden daghe des vernoys: ende dine sonden sullen worden ontbonden. gelijc den yse in heten wedere.

18

Van hoe quaden gheruchte is hi. die den vader laet: ende hi is vermaledijt van gode die sijn moeder veronwaert

19

Kint mijn voldoe dijn wercken in sachtmoedicheit ende du sultste worden ghemint bouen der menschen glorie.

20

Alsoe altstu groter biste also veel te meer veroetmoe-

[p. *283]

dighe di in allen. ende du sultse gracie vinden voer gode:

21

want die grote macht is gods allene: ende hi wort gheeert van den oetmoedighen.

22

En soke gheen hogher dinghen dan du biste: ende en ondervinde gheen starcker dinghen dan du biste: mer dat di god geboden heeft pense altoes: ende in sine veel wercken so en wes niet ondersokende.

23

Want di en is niet noot. die dinghen te sien mit dinen oghen die verborghen sijn.

24

In ouertallighen dinghen en wil niet ondersoken menichuoudelijc. du en sultse niet sorchuoudich sijn in veel sijnen werken.

25

Want veel dinghen sijn dij getoent bouen der menschen sinnen.

26

Want die waninghe van dien dinghen heeft veel luden ondertreden: ende behielt haer sinnen in ydelheit.

27

Een hert herte salt quaet hebben inden vtersten: ende die vreselike daet mint. hi sal daer in veruaren

28

Een herte dat twe weghen ingaet en sal gheen ruste hebben: ende die van quader herten is hi salre in worden geschent

29

Een quaet herte sal worden verzwaert in rouwen: ende een sonder salre toedoen te sondighen.

30

Der houerdigher synagoghen en is ghene ghesontheit: want die plante der sonden sal in hem worden ontwortelt. ende men en salts niet verstaen.

31

Eens wijs herte verstaetmen in der wijsheit: ende een guet ore sal wijsheit horen mit alre begheerten.

32

Eens wijs herte ende verstandich sal hem wachten van sonden: ende het sal voertganc hebben inden werken der gherechticheit

33

Dat water blust dat barnende vier: ende die aelmisse wederstaet die sonden

34

ende god is die aenscouwer die den danc wedergheuen sal. Ende hi gedenct in dat nacomen sal: ende inden tide sijns vals sal hi een vast herte vinden.