Bible in duytsche (Delftse bijbel 1477)

§ Capit .ij.

1

SOne mijn alstu tot gods dienste gaetste. soe stant in vresen ende in gerechticheden: ende bereide dijn ziel tot becoringhe.

2

Verneder dijn herte ende ontbeide: helde neder dijn oren ende ontfanc die woorden van verstandenisse: ende en haest niet inden tiden der wedersegginghe.

3

Ontbeide gods onthoudinghe: worde te gode gheuoghet ende ontbeide: dat inden vtersten dijn leuen wassen moet.

4

Al dat di toeghebrocht wert ontfanc. ende ghedoge in rouwen: ende heb gedoechsaemheit in dijnre oetmoedicheit:

5

want inden vier proeftmen dat gout ende dat siluer: mer die ontfanclike mensche inden fornaise der vernederthede

6

Gheloue gode ende hi sal di vermaken: ende bestueren dinen wech hope in hem Ende houde sine vrese: ende veroude daer in.

7

Die god ontsiet ontbeit sine ontfermherticheit: en neyghet van hem niet dat gi niet en moet vallen.

8

Die den here ontsiet. gheloeft hem: ende v loen en sal niet worden verydelt

9

Die den here ontsiet. hoopt in hem: ende in ghenoechten sal v ontfermherticheit comen.

10

Die den here ontsiet. minnet hem: ende uwe herten sullen worden verlicht.

11

Kinder bescouwet dat gheslachte vanden mensche: ende weet dat nyemant in den heer en hoepte. ende confuus wort.

12

Ende wie bleef in sijn gebode. dat hi ghelaten wort? Wie aenriep den here: dat hien versmade?

13

Want god is goedertieren. ende ontfermhertich: ende inden tiden des vernoys sal hi die sonden vergheuen: ende hi is beschermer van alden ghenen dien versoken in waerheden.

14

Wee enen man van dubbelder herten ende van quaden lippen. ende den handen die quaet doen ende den sondaer die dat lant in coemt mit tween weghen:

15

Wee den onghemanierden van herten. die gode niet en ghelouen: daer om en sullense van hem

[p. *282]

niet worden beschermt.

16

Wee den ghenen die verloren hebben dat ghedoeghen: ende die gherechte weghen ghelaten hebben: ende of gekeert sijn in quaden wege.

17

Wat sullense doen alst god begint te ondersoken?

18

Die gode ontsien si en sullen sijnre woerden niet onghelouich sijn: ende dien minnen sullen sinen wech behouden

19

Die den here ontsien die sullen ondersoken die dinghen die hem genoechlijc sijn: ende die hem minnen sullen worden veruollet mit sijnre wet.

20

Die den here ontsien si sullen haer herten bereiden si sullen haer zielen heilighen in sijn aenscouwen.

21

Die den here ontsien ende behueden sijn gheboden: die sullen gedoechsaemheit hebben tot sinen aenscouwen.

22

ende si sullen segghen. Ist dat wij gheen penitencie en doen. so sullen wi vallen inden handen gods: ende niet in des menschen handen.

23

Want na sijn grootheit: alsoe is oec sijn ontfermherticheit mit hem