Bible in duytsche (Delftse bijbel 1477)

Ende hier beghint dat eerste cappittel.

[p. *280]

1

VAnden heer god is alle wijsheit: ende si was mit hem altoes: ende is voerden beghinne

2

Dat sant vander zee. ende die dropelen vanden reghen. ende die daghen vander werelt: wie heeftse ghetelt? Die hoocheit vanden hemel. ende die breetheit der aerden. die diepheit der afgronden: wie heeftse ghemeten?

3

Gods wijshit die voer alle dinc gaet: wie heuetse ghegrondet?

4

Die wijsheit wort eer ghescepen dan alle dinc:: ende die verstandenisse der vroetscappen vanden beghinne.

5

Die fonteyne der wijsheit is gods woert dats die soon gods inden hoochsten: ende haer inganc sijn ewighe gheboden.

6

Wien is gheopenbaert die wortel vander wijsheit? Ende wie bekende haer behendicheit discipline der wijsheit:

7

wien is sie vertoent ende gheopenbaert: wie bekende die menichte haers ingancs?

8

Een is die alre hoochste scepper vermogende. ende een sere machtich coninc ende sere tontsien: ende hi sit opter wijsheit troen ende hi regneert: god

9

hij sciepse in sijnen heilighen gheest? Hij heefse gesien ende getellet ende gemeten.

10

Hi heeftse wtghestort op alle sine werken ende op allen vleysch na sijn gauen: ende hi heeft die ghegheuen den ghenen die hem minnen.

11

Des heren vrese is glorie den ghenen dien minnen: ende blijscap ende een croen der vroechden.

12

Des heren vrese sal der herten ghenoechte gheuen ende si sal blijscap ende vruechde gheuen in lancheden der daghen.

13

Die den here ontsien hem sal wel wesen inden lesten: ende hi sal worden ghebenedijt inden dage sijnre doot.

14

Gods minlicheit is eersame wijsheit:

15

soe wie datse openbaert in sien. si minnense: in visioen ende inder bekenninghe van haren grootheden

16

Dat beghin der wijsheit is des heren vrese: ende si wort gheboren mitten ghetrouwen. inder moeder lit van geboerten: ende si sal gaen mitten vercoren wiuen: ende si sal worden bekent mitten gherechtighen ende mitten ghetrouwen.

17

Des heren vrese is conste der religioesheit.

18

Ende religioesheit sal dat herte wachten ende gherechticheit maken: ende si sal oec gheuen blijscap ende vruechde.

19

Die gode ontsiet hem sal wel wesen: ende inden daghe sijnre beuindinghe sal hi worden ghebenedijt.

20

Die volheit van wijsheit is gode te ontsien: ende die volheit van haren vruchten:

21

ende sij sal al sijn huys veruollen van gheslachten: ende die onthoudende vaten van haren scatten

22

Des wijsheits crone is des heren vrese: veruollende den vrede ende die vrucht der salicheit:

23

ende hi sachse ende teldese Want beide sijn si gods ghiften.

24

Die wijsheit sal behouden te dele const ende verstandenisse der vroetscappen: ende sij verheft der gheenre glorie die haer nemen

25

Die wortel vander wijsheit is gode tontsien: want der vresen telgheren sijn lancliuicheit.

26

Inder wijsheit tresoer is verstandenisse ende gheestelijcheit der const: mer den sondaer is die const een veronwaerde.

27

Des heren vrese veriaghet die sonden.

28

Want die sonder vrese is. hi en mach niet ghe-

[p. *281]

rechtich worden: want die toorn sijnre oueruloedicheit is sijn wtwerpinghe

29

Die ghedoechsamighe sal ghedoghen tot inder tijt: ende daer na sal sijn die wedergeldinge der blijscap.

30

Een guet sin: sal verborghen sijn. sijn woorden totter tijt: ende veel der menschen lippen sullen sijnen sin vertellen.

31

Inder wijsheit tresoer is die beteykeninghe der disciplinen:

32

mer den sondaer is gods oeffeninghe een veronwaerden.

33

Sone mijn al begerende die wijsheit. so behoude gherechticheit: ende god sal di die geuen.

34

Want die wijsheit ende die discipline sijn des heren vrese: ende dat der vresen ghenoechlijc is

35

dats tgheloue. ende saftmoedicheit: ende die sal alle sijn tresoer veruollen.

36

En wes niet onwaerdich ende niet onghelouich des heren vrese: ende en ganc tot hem niet mit dubbelder herten.

37

En wes gheen ypocrijt inden menschen aenscouwen: ende du en sultste niet worden ghescandalizeert in dijnen lippen

38

dattu bi auonturen niet en valtste: ende settes dijnre zielen een scaemte ende dattu di toebrenghes oneerlijcheit

39

ende dat god dine heimelicheit ondecke. ende dat hi di verstote int midden der synagogen:

40

om dattu qualic totten here ginghes. ende dijn herte is vol quaetheden ende bedrieghinghe.