Bible in duytsche (Delftse bijbel 1477)

§ Ca .xviij

1

MIt dinen heilighen was dat alremeeste licht: ende die vianden die hoerden dese stemme: mer si en sagen gheen maecsel. Ende om dat dijne heilighen biden seluen pijnen niet ghepijnt en worden. so loefdense di:

2

ende die voer ghequetst waren om dat si niet en worden ghequetst so dancten si di: ende baden dat die onderscheit der ghiften soude sijn

3

Om dit so hadden si enen leider inden onbekenden wech ende barnende calumpne viers: ende du verlenes hem die sonne sonder quetsinghe der gueder herberghen.

4

Oec ware die ghene waerdich des lichtes te deruen ende te ghedoghen den kerker van duusternisse die dine kinderen wachten besloten. biden welcken begonste te worden ghegheuen der werlt dat onbesmette licht: vander wet als si pensden der gherechtigher kinder te doden.

5

Ende als een kint wt gheset was ende verlost in hare verdefnisse. soe leidestu wech die menichte vanden kinderen. Ende du verlostse die ghene te gader wt egipten in een groot water.

6

Want dien nacht was voer bekent van onsen vaders: om dat si waerlijc wisten wat ede dat si gheloefden: om dat sijs te gestadigher vanden zielen souden sijn

7

Oec here so wort ontfaen van dijnen volke: der gherechtigher ghesontheit ende der ongherechtigher verderfnisse

8

Want ghelijc dattu onse wedersaken quetstes: also verhiefste ons ende oeck grotes.

9

Want die kinder der gherechtigher die guet waren. si sacrificeerden verborghentlijc: ende si besetten in eendrachticheit die wet der gerechticheit des ghelijc die gherechtighe die guet ende quaet ontfaen souden: die songhen vaderlike loue vanden vianden wederluden.

10

Ende men hoerde een weenlijc ghescrey vanden beweenden kinderen.

11

Want die knecht ende here wort mit gheliker pijnen ghepinighet ende ghequellet: ende een ghemeen mensche wort ghepijnt gheliken enen coninc.

12

Daer om soe haddense oec alle in enen name der doot. onvertellike doden. Want der leuender en was niet om te grauen die doden: want

[p. *278]

in eenre wilen soe wort verderft dat schoenste gheslacht van hem luden.

13

Want om dat si van allen dinghen niet en gheloefden om die weldaden: doe also die verderfnisse vanden eersten gheboren. soe beloefdense hem gods volc te sijn.

14

Want als alle dinghen rustende gheswijch hielden. ende dien nacht den middel ghegaen hadde in sijnen loop:

15

here dine almachtighe reden quam vanden hemel wt. ende vanden conincliken sitten viel neder een hertvechter int midden dat lant der verderfnisse:

16

een scarp swaert draghende dijn ongheueinsde ghebot: ende staende heeft hi veruollet alle dinc mitter doot: ende tgheraecte totten hemel staende op die aerde.

17

Als dat van quaden dromen die quade verstoorden: ende als op hem quamen die vresen die si niet en waenden.

18

Ende als die een darwaert gheworpen was half leuende: soe vertoonde hi di sake der doot waer omme hi starf.

19

Want die visioene die die ghene verstoerden vermaendese van desen dinghen: om dat si niet en souden veruaren sonder weten: waer om si dat quaet ghedachten.

20

Ende oec soe ghenaecten doe die gherechtighe die becoringhe der doot: ende der menichte beroeringhe wort ghemaect inder woestinen: mer dijn grsamsap en bleef niet langhe.

21

Want het liep een mensche sonder beclaghinghe bidden voer dat volc: dat hi voert brochte die bedinghe den scilt sijns dienstes: ende mit wieroec te verbornen so sende hi die bedinghe mede ende wederstont. die gramscap ende der noot maecte hi een eynde thonende dat hi dijn knecht is

22

Want hi en verwan die scaren niet mit des lichamen cracht. noch mit wapenen der macht: mer hi deden tonder mit enen woerde die hem quellede: ende hi ghedochte der vaderen eedt ende des testaments.

23

Want als si te hant ghehoopt waren geuallen deen op dander doot: soe stont hi tusschen. ende sneet dat bedruusch of: ende hi schiede dien wech die ten leuenden waert leide.

24

Want in een priesterlijc cleet dat hi hadde soe was hi alder werelt rontheit: ende der vaderen grote dinghen waren ghegroueert in vier ordinancien van stenen: ende dine grootheit was ghescreuen inder cronen sijns hoefts.

25

Dese dinghen wijcten of ruumden diese dootsloghen: ende dese dinghe ontsach hi. Want het was allene een becoringhe ghenoghende der gramscap.