Bible in duytsche (Delftse bijbel 1477)

§ Capit .xix.

1

MEr op die quade quamen die gramscappen tot inden eynde sonder ontfermherticheit. Want hi wiste oec dat dien toecomende was:

2

want als sij hadden ghelaten dat si souden verleiden ende si die voer hadden ghesent mit groter sorchsaemheit: soe volchden hem die wercken van penitencien.

3

Want doe si dat gheween onderhanden hadden ende si beweenden dat doder graft soe namen si tot haren behoef tot een ander ghepens der onwetenheit die si biddende verworpen hadden: dese iaechden si ghelijc vluchtich

4

Want waerdighe nootsaken leidense tot desen eynde: ende si verloren dat ghedencken vanden dinghen die gheschiet waren: om dat die

[p. *279]

dinghen die ghebraken dat castien vanden tormenten souden voldoen:

5

ende om dat dijn volck wonderlijc ouerliden soude: mer dat die ghene enen nyewen doot vinden souden.

6

Want elc creature wort gheteykent tot haren gheslachte vanden beghinne dienende dinen gheboden: om dat dijn kinderen souden worden ghehuet onghequetst.

7

Want een wolc ouerdecte haer ghetelte: ende te voren vten water openbaerde droge aerde: ende een wech sonder beletten vter roder zee: ende een velt groeyende van groter diepheit:

8

doer twelke dat alle gheslachte doer leet wort bedect mit dijnre hant. ende si saghen wonder ende onghesien dinghen.

9

Want si hadden ghedestrueert di spise als paerden: ende si verblijden als lammeren di louende here: want du verlostese.

10

Want si waren noch ghedenckende der dinghen die ghedaen waren int lant haerre vreemtheit: hoe die aerde vlieghen wt brochte voer dat geslachte van beesten: ende hoe die vluet wt crielde ene menichte van vorsschen voer visschen.

11

Ende ten lesten saghen sij ene nyewe creatuer voghelen doe si verleet van begheerte eysscheden spise der werscap.

12

Want inder toesprekinge van der begheerte soe quam hem op vander zee velthoenre: ende op den sondaers quamen quellinghe niet sonder die prouinge die voer gheschiet waren biden cracht vanden vlueden. Want gherechtelijc ghedoechden si na hare quaetheden.

13

Want si setten oec dat gasten te herberghen. dat te veronwaerden was. Want sulke ontfinghen mit onbekende toecomelinghe: ende sulke dwonghen te dienste guede gasten.

14

Ende dit niet alleen: mer oec so was hem een ander aenscouwen: want genoede ontfinghen si die van buyten.

15

Mer die ghene die si ontfinghen mit vruechden die sulke gherechticheden ghedaen hadden: si queldense mitter alre meester pinen.

16

Want si worden gheslaghen mit blintheden ghelijc den ghenen van sodoma in des gherechtighes doeren: als si ouerdect waren mit haestigher duusternissen Elc sochte den ouerlijt van sijnre doren.

17

Want als die elementen in hem bekeerden. so wort dat gheluut verwandelt gelijc in een orghane: ende si wachten al haer gheluut Waer bi dat is te wane ende wt ghewarighen sien te bekennen.

18

Want die weelde dier verkeerde inden waterachtighen: ende alle dinghen die zwemmende waren ghinghen ouer in die aerde.

19

Dat vier vermochte bouen sijn crachte int water: ende dat water vergat der blusschender naturen.

20

wederkeert soe en quelde die vlamme niet tfleesch vanden dootliken dieren die mit hem wanderden: noch si en scoerde die guede spise niet die lichte wort gescoert ghelijc den yse. Here in allen makestu dijn volc groot ende hebtste gheeert: ende du en versmaetste niet hem bi te staen in allen tiden ende in allen steden

Hier gaet wt dat boeck der wijsheit.