Bible in duytsche (Delftse bijbel 1477)

§ Ca .xvi.

1

OM dit ende om deser gheilke gedoechdense waerdighe tormenten ende si sijn verderft mit menichte van beesten.

2

Doer welke tormenten du dijn volc hebtste wel gheregeert den welcken du hebtste ghegheuen die begheerte haerre ghenoechten. nyewen smaec. hem spise bereidende velthoenren:

3

om dat si alle spise begheerden. om die dingen die hem ghetoent ende geseit waren. souden oec worden ofghekeert van notorftighen begheerten. Mer dese die in cortter tijt arm waren gheworden. ghesmaecten nyewe spise.

4

Want sonder ontscult moeste dien opcomen die verderfnisse. die ghene die wreetheit wrochten: mer alleen soe moestmen dese toegen hoeghedaenre wijs men haer vianden verderfde.

5

Want als op hem quam wrede gramscap vanden beesten: so worden si verdreuen mit verkeerden slangenbeten.

6

Dine gramscap en bleef niet ewelijc: mer si worden in cortter tijt verstoert om berispinghe: ende si hadden

[p. *275]

een teyken der salicheit. te ghedencken des ghebodes van dijnre wet.

7

Want die gheen die bekeerden en worden niet ghesont bi dien dat hi sach: mer bi di alle dinc behouder

8

Ende oec in dit toenstu dinen vianden: dattu biste die verlost van allen quaden

9

Want die beten vanden spelthanen ende vanden vlieghen doden die ghene: ende men en vant ne ghene ghesonde tot hare zielen: want si waren waerdich te worden verdoruen mit dustanighen dinghen:

10

mer die tanden vanden gheuenijnden draken en verwonnen dijn kinder niet. Mer dine ontfermicheit die toequam genas die.

11

Want si worden gheproeft inden ghedencken van dinen redenen: ende behouden om dat si niet vallen en souden in die diepe verghetelheit ende si dan niet en souden ghebruken moghen dijnre hulpen.

12

Ende oec en genasse gheen cruut noch playster: mer dijn reden here die alle dinc geneest.

13

Heer du biste die des leuens ende des doots macht hebtste: ende du leides ter poorten vander doot ende brengeste weder.

14

Mer een mensche slaet doot oeck yemant bij quaetheden sijn ziel. ende als die gheest wt is ghegaen. so en sal hi niet wederkeren. noch hi en sal die ziel niet wederroepen die ontfaen is:

15

mer dijn hant tontvlien is onmoghelijc.

16

Die quade lochende di te kennen. si sijn ghegheselt bider starcheit dijns arms: si ghedoechden der quellinghe vanden niewen wateren ende van haghelstenen ende van reghen ende mitten vier so worden si verderft.

17

Want dat wonderlijc was in dat water dat alle dinc lesschet. so vermochte dat vier meest Want die werlt is der gherechtigher wrake.

18

Want tot ghenen tide so en stillede dat vyer om dat di beesten niet en souden worden verbrant die ghesent waren totten nydighen: mer om dat si siende souden weten. dat si mit gods oerdel ghedoghen quellinge.

19

Ende sulke tijt. so bernede dat vyer int water allesins bouen cracht: om dattet soude verdriuen die ongherechtighe gheslachten der aerden.

20

Doer die welcke du dijn volc voedes mitter enghelen spise: ende dat berede broot verleenstu hem van den hemel sonder pijne dat alle ghenoechlijcheit in hem hadde: ende die sueticheit van allen smaec.

21

Want die guetheit ende die suetheit diestu inden kinderen hadtste die toenstu: ende het diende enen ygheliken tot sinen wille. ende soe waer toe dat hi woude daer toe bekeerde hi.

22

Want sne ende ijs gedoechde die cracht vanden viere. ende en smolten niet: om dat si weten souden datter vianden vrucht dat vyer verderfde barnende: inden haghel inden blixem ende inden regen.

23

Ende daer om vergat dat vier echter sijn cracht: dat die gherechtighe souden worden gheuoedet.

24

Want die creature die dient sinen scepper. ende ontsteect inden tormenten teghen die ongherechtighe: ende het wort lichter om den ghenen wel te doen die dij betrouwen.

25

Om die so wandelense doe oec in alle dinc ende dienden alle dinghen voester moder dijnre gracien tot dier dinghen wille diemen van di begeerde:

26

om dat here die kinder souden we-

[p. *276]

ten wie du mindes. Dat der geboerten vrucht den menschen niet en voede: mer dijn reden behout die ghene die in di ghelouen.

27

Want dat biden viere niet en mochte worden verderft. stapphants smeltende alst verwarmde vander sonnen vyerliken raeyen:

28

om dattet allen menschen kenlijc soude wesen. datmen voer die sonne moet comen totter benedictien ende ten oest waert vanden lichte dij aenbeden.

29

Want eens ondanckelijcs hope versmelt als herfsts ijs: ende hi sal vergaen als onnutte water