Bible in duytsche (Delftse bijbel 1477)

§ Ca .xv

1

MEr onse god du biste suet ende gewarich: ghedoechsaem ende alle dinc setstu in ontfermherticheden.

2

Want al ist dat wi sondigen wij sijn dijn. wetende dine grootheit: ende ist dat wi niet en sondighen: soe weten wi dat wi bi di gherekent sijn.

3

Want di te kennen is volmaecte gherechticheit ende te weten dine waerheit. ende dine gerechticheit is wortel der ontsterflijcheit.

4

Want dat voerpensen vanden menschen quader conste en brochte ons in ghene dwalinghe. noch die scheme vanden beelden. pinen sonder vrucht ghegraneert mit menigherhande verwe.

5

Welcs aenscouwen enen sotten gheest begheert: ende hi mint ene ghelikenisse eenre doder beelde sonder ziele.

6

Die dustanighen hope hebben. si sijn waerdich der doot: die minres vanden quaden diese maken. ende diese minnen ende diese oeffenen.

7

Mer oec een pottemaker scept mit pinen morwe aerde duwende te hant vaten tot onser behoeften. ende vander seluer aerde: maect hi vaten te besighen die suuer sijn ende oec die desen contrarie sijn. Ende van desen vaten tot so wat behoeften si sijn is die potmaker oerdelaer.

8

Ende maect

[p. *274]

mit ydelre pinen een afgod vander seluer aerden. die gene die luttel daer voer vander seluer aerden gemaect is: ende daer na een luttel soe leidet hem weder daer of dat hi genomen was. alsmen hem eysschet die scout vander zielen die hi hadde.

9

Mer hem is sorghe. niet om dat hi arbeiden sal: noch om dat hem dat leuen cort is: mer hi stridet mitten goutsmeden ende mitten seluersmeden: mer oec soe volcht hi na mit wercken den coperwerckers: ende hi heeft glorie dat hi maket alte ydel dinghen.

10

Sijn herte is assche: ende sijn hope is alte ydel aerde. ende sijn leuen is vuylre dan modder

11

want hi en weet niet wie hem gemaect heuet: ende wie hem die ziel inblies dier werct: ende wie hem den leuende gheest in blies.

12

Mer si achten onse leuen spel te wesen: ende dat die wanderinge vanden leuen ghemaect was te ghewinne. ende datmen allesins oec dat mit quade beiaghen moet.

13

Want dese weet dat hij bouen al misdoet: die vander aerden materie broessche vaten ende ghegroueerde afgoden maect.

14

Want alle onwise ende onsalighe bouen mate der zielen houaerdich. sijn dijns volcs vianden. ende hem ghebiedende.

15

want si achten gode te wesen alder gheslachten afgoden. den welken gheen behoef en is vanden ogen omme te siene. noch noeslocken omden geest te vernemen: noch oren om te horen: noch vingheren vanden handen om te tasten: mer oec sijn hare voeten traghe om te wanderen.

16

Want die mensche heeftse ghemaket: ende die den gheest ontleent heeft. hi mactese. Want gheen mensche en sal moghen maken enen god hem gelijc.

17

Om dat hi sterflijc is: so maect hi enen doden mit ongherechtighen handen. Want hi beter is dan die dinghen die hi oeffende: want hi leefde oec al was hi sterflijc: mer die en leefde nye

18

Mer oec oeffenense alle keytiuige beesten. Want alsmen ghelikent die ongheuoelike dinghen. ende dese dinghen: soe sijn sij argher dan dese dinghen.

19

Mer noch en geen van desen beesten en mach mitten aenscouwen goede dinghen bescouwen. Want si hebben wtgestort gods lone: ende sine benedictie