Bible in duytsche (Delftse bijbel 1477)

§ Ca .xiij

1

ALle menschen daer gods conste niet in en is die sijn ydel: ende van dien die guet schinen so en mochtense niet verstaen hem die is: noch als sij die wercken mercten. so en bekenden si

[p. *271]

niet wie die maker was:

2

mer of dat vier. of den wint. of die barnende lucht of den ommerinc vanden sterren. of dat grote water: of die sonne of die mane die regerers der ronder werlt. achten sij goden.

3

Ende of si in die ghedaente van desen dinghen also ghenoechte hadden. dat sijse goden waenden: so moesten sij hebben gheweten hoe veel meer preciosior is die here van desen Want die scepper vanden ghedaenten maecte alle die dinghen.

4

Ende of si alle haer crachten ende haer wercken verwonderen: so verstaen si oec van dien. dat die ghene die dese dinghen maecte starcker is dan si.

5

Want an die grootheit der ghedaenten ende der creaturen: so machmen bekenlijc sien den scepper van desen.

6

Mer nochtan is dat minste beclaghen in desen. Want bi auonture dese dwalen oec gode sokende: ende willen hem vinden.

7

Want oec als si in sinen wercken wanderen: so ondersoeken si ende hebben raet: wanttet guede dinghen sijn die men siet.

8

Ende echter en salmen hier omme dese niet vergeten.

9

Want of si so vele weten mochten dat si die werelt mochten micken: hoe en vonden si den here vander werlt niet lichteliker?

10

Si sijn onsalich. ende haer hope is onder den doden: die heten die werken van menschen handen goden: als gout of siluer die vindinge vander const ende die ghelikenisse van beesten: of enen onnutten steen eenre ouder hantwerc

11

Want of enich wercman een timmerman vanden bosch een recht hout houdede: ende des gheleerde houde daer of alle die bast. ende dat hij besighende sijn const aernstelijc daer of maecte een oerbaerlijc vat inden bezighen vanden leuen:

12

mer dat hi die spaenre vanden werke besighe inder bereidinghe van spise:

13

ende dander hier of dat hi te gheen behoefte en doet. een cromhout ende vol warren aernstelijc dat versnide mit sijnre ydelheit: ende hi dat scept mitter const sijns ambochts. ende dat hij dat ghelijc maect eens menschen beelde.

14

of na enighe beeste dat ghelijc maect: ende hijt dan saluet mit rubrike. of mit vermelioen. ende hi mit verwen root maect sijn ghedaente ende hi mit aerden besaluet alle die smetten die daer in sijn:

15

ende hi hem maect een waerdighe woninghe ende dat dan set in enen wech.

16

ende hi hem des te voren besiet dat hijt vaste maect staende mit ysere dattet bi auenturen niet en valle: want hi weet dattet hem seluen niet helpen en mach. Want een beelde ist dat help behoeft.

17

Ende hi duet belofte van sijnen guede. ende van sinen kinderen. ende van brulochten. ende vraecht dien beelde. Hi en scaemt hem niet te spreken mettien dat sonder ziele is:

18

ende hi bid oec den onmachtigen om ghesontheit. ende hi bidt den doden om dat leuen: ende den onnutten so anroopt hi in hulpen:

19

ende hi bidt den ghenen om den wech die niet wanderen en mach: ende van te beiaghen. ende van te wercken. ende van ghesciente van alre dinc. so bidt hi den ghenen die in allen dinghen onnutte is.