Bible in duytsche (Delftse bijbel 1477)

§ Ca .xij

1

HHoe guet. ende hoe zuet is heer dijn gheest in ons allen

2

Hier so begreepstu mit delen die ghene die dwalen: ende du vermaenstese vandien daer si mede sondichden: ende du spreecste hem toe dat si die quaetheit laten. ende ghelouen in di here.

3

Want die oude luden die woenden in dijn heilige lant die welke du veronwaerdes:

4

want si deden wercken die du hates bi ongerechtighen ende van sacrificien:

5

ende die doders waren van haren kinderen sonder ontfermherticheit. ende die aten der menschen binnenste. ende die dat bluet verslinden. van midden dinen sacramenten:

6

ende meerres vader ende moeder vanden ongheholpen zielen die woutstu verderuen: bi onser vadere handen.

7

om dat si nemen souden die waerdighe pelgrimagien van gods kinder: welc lant di bequamer is dan alle landen.

8

Mer oec spaerstu desen ghelijc menschen ende du sendes voerganghers dijns heers. vespen: dat si allencxken verderuen souden

9

Niet om datstu ommachtich waerste die quade den gueden onder te doene in stride. of in wreden beesten. of mit enen harden woerde te gader te verderuen:

10

mer bi delen oerdelende. soe gaefstu stat van penitencien niet ombekennende dat haer gheslachte ongherecht was. ende haer quaetheit natuerlijc: ende dat nemmermeer haer ghepens en mochte worden verwandelt.

11

Want het was vermaledijt zaet vanden beghin. Noch

[p. *270]

nyemant ontsiende: gauestu ghenade haren sonden.

12

Want wie sal di seggen wat heuestu gedaen? Of wie sal staen teghen dijn oerdel? Of wie sal comen in dijn aenscouwen rechter vander ongherechighen menschen? Of wie salt die oplegghen: ist dat die gheslachten vergaen die du makeste?

13

Want anders gheen god en is dan du. den welke sorge is van allen dinghen: om dattu sultste tonen dattu niet ongherechtelijc en oerdelst dat vonnisse.

14

Coninc noch tyran en sullen niet ondersoken in dijn aenscouwen. van dien diestu verloren hebtste.

15

Daer omme om dattu gerechticht biste so regeerste alle dinc gherechtelijc: du verdomes oec den genen diemen niet sculdich en iste pijnen: ende du achste vreemde van dijnre cracht

16

Want dijn cracht is tbeghinnen van dijnre gerechticheit: om dattu alre dinghen here biste: soe doetstu di alle dinghen sparen.

17

Wanttu tones dijn cracht. ende du wordes geloeft. noch geen eynde hebbende in dijnre cracht: ende die ghene die di niet en weten leuerstu ouer in stoutheit.

18

Wantu here der cracht. du oerdelste mit gestadicheden: ende mit groter waerdicheit regeerste ons. Want di ist tonder. dat tu wiste te vermoghen.

19

Want du leerste dijn volc bi sulken werken. dat moet gherecht wesen ende menschelijc: du makeste dijne kinderen van gueder hopen: want al dat werckende so gaefstu inden sonden stat van penitencien

20

Want of tu dijnre knechten vianden ende die der doot sculdich waren. mit sulker verstandenisse tormentes ende verlostes: tijt ende stat gheues. daer si bi mochten worden bekeert vander quaetheit:

21

met hoe groter aernsticheit wonnestu dan dijn kinderen. welke vaderen du gaues ere ende voerwaerde van gueden gheloften?

22

Daer om alstu ons discipline geues: so gheeselstu menichfoudelijc onse vianden: om dat wij al oerdelende sullen pensen dine guetheit: ende alsmen van ons oerdelt so sullen wi hopen dine ontfermherticheit.

23

Waer bi dattu den genen die in haer leuen sottelijc ende ongherechtelijc leefden: bi dien dinghen dien si oeffenden soe gauestu alre meest torments.

24

Want si dwaelden oec langhe inden weghe der dwalinghe: om dat si die goden achteden die inden beesten onnutte sijn: ende om dat si leefden na den zeden van sotten kinderen.

25

Om dat so gauestu hem oec dat vonnisse in bespotten ghelijc sotten kinderen.

26

Want die niet bespot en sijn mit bespotten ende mit berispinghe: si hebben gods ghewarich vonnisse onderuonden

27

Want in dien dinghen welcke si ghedoechden. verdroghen si zwaerlijc: want in dien te ghedogen hadden si onwaerdicheit. Bi dien die si gode achteden in hem worden verdoruen: siende den ghenen die wijlneer lochenden te kennen: so bekenden si den gewarighen god. Om dit sal oec dat eynde van haerre verdomenisse op hem comen.