Bible in duytsche (Delftse bijbel 1477)

§ Capit .xi

1

ENde si beliede der gheenre werken in des heilichs propheten handen.

2

Si maecten een wech doer die woestine daermen niet in en woende: ende si setten hutten in woesten steden.

3

Ende si stonden teghen die vianden: ende wraken hem ouer die vianden.

4

Si hadden dorst ende si anriepen di here: ende hem wort ghegheuen water wt alten hoghen steen: ende rusten vanden dorste van enen harden steen.

5

Want bi dien daer haer vianden pine mede doechden. van gebreke haers drancs: als die kinder van israhel daer in oueruloeyden so verblidense

6

Bi desen dinghen die hare vianden ghebraken: soe wort mit desen wel ghedaen.

7

Want voer die fonteyne der ewigher vluet. so heuestu den ongherechtighen ghegheuen menschelijc bluet.

8

Ende om dat si niet en souden worden gheminret inden doortreckinghe vanden ghedoden kinderen: so gauestu hem oueruloedich water der onghehoopter salicheit:

9

ende toendes biden dorste die doe was: in hoedanigher wijs. du die dine verheffen soutste: ende haer wedersaken doden

10

Want als si becoert waren. ende si oec discipline ontfingen mit ontfermenisse: so wisten si in hoedaniger wijs dat die quade die mit gramscap gheoerdelt waren tormenten doghen souden.

11

Want du proues dese als een vermaende vader: mer du veroerdelste die ondervraghende als een wreet coninc.

12

Want die ghene die daer teghenwoerdich waren ende die daer niet en waren worden gelijc ghepijnt.

13

Want dubbelt verdriet haddense gheuonden. ende dat suchten mitten ghedencken vanden dinghen die geleden waren.

14

Want als si hoerden bi horen tormenten datmen wel mit hem dede soe ghedochten si des heren: ende verwonderden int eynde vanden wtganghe

15

Want den ghenen dien si wt ghesteken bespotteden in quader wtsettinghe desen dorst hebbende: verwonderden int eynde vander daet. Ghelikelijc en dede hi den ougherechtigen niet:

16

mer om die sotte ghepensen haerre quaetheit Ende om dat sommighe dwalende oeffenden stomme serpenten ende ydel beesten: so sendestu in hem om die wrake een menichte van stommen dieren:

[p. *269]

17

om dat si weten souden dat elc wort ge ghequelt bi dien dinghen. daer hi mede sondicht.

18

Want dine almachtighe hant en was niet onmoghende. die die werelt sciep van onsienliker materien in hem te senden een menichte van beren: of stoute leeuwcn.

19

of enighe van nyewen maecsele vol gramscapen. ende onbekende beesten: of beesten die blasen hetten van viere. of roke van stanc voert brochten: of die verderflike voncken scoten wt haren oghen:

20

welke quetsinge die mensche niet alleen en soude mogen verderuen: mer dat aensien mochten oec doden van anxte.

21

Mer oec sonder dese so hadden sie oec moghen worden ghedoot mit ende winde verdriet doghende van haers selues wercken: ende si hadden moghen worden ghestroeyt biden gheest dijnre macht: mer du hebtste alle dinc gheordineert in maten ende in ghetal ende in ghewichte.

22

Want veel te vermoghen was di alleen altoes bouen ende wie sal mogen wederstaen die cracht van dijnen armen?

23

Want ghelijc die tonge van eenre waghe. also is voer dij dien rinc die werelt: ende ghelijc een dropel douwes voerden lichte die neder comt in die aerde.

24

Mer du ontfermes alre dinc. want du vermoges alle dinc du venseste der menschen sonden om die penitencie.

25

Want du mintste alle dinc die sijn. ende niet en haetstu van dien dattu ghemaect hebtste: want mit hatyen en settestu gheen dinc. noch en makestu.

26

Want hoe soude enich dinc mogen duren ten waer ofstuut hadste ghewilt of hoe soude enich dinc moghen worden onthouden dat van di niet gheropen en waer?

27

Want du spaerste alle dinghen want si sijn di. here die alle zielen minste