Bible in duytsche (Delftse bijbel 1477)

§ Capitttel .x.

1

DEse wijsheit behuede den genen die eerst gheformeert was van gode den vader des ommerincs der werlt als hi alleen was ghescepen:

2

ende si leide dien wt van sijnre misdaet. Ende leiden wt vanden lime der aerden: ende si gaf hem cracht alle dinc tonthouden

3

Alse dese ongherechtighe wech ghinc in sijnre gramscap: doe vervoer die bruederlicheit bider gramscap der manslachticheit.

4

Om den welken als dat water dat lant verderfde: so ghenas die wijsheit weder: echter den gherechtighen bestierende ouermits enen versmadeliken houte.

5

Dese wijsheit als hem den gheslachten in volghinghe der houaerdie hadde ghegheuen in consente van quaetheden so wiste si den gerechtighen: ende behilten gode sonder clage ende die ontfermicheit behueden starc inden sonen.

6

Die wijsheit die verloste den gherechtighen. ende vliende vanden quaden die verderft worden: daer dat vier neder quam in pentapolim:

7

inden welken in ghetughe der quaetheden dat woeste lant roeck achtich blijft: die bome hebben ghebracht te sekeren tiden vrucht: ende in een ghedencken der onghelouigher staet een hoop souts.

8

Want die gene die die wijsheit ouerghinghen si en vielen in dit alleen niet dat si die guede dinghen niet en wisten: mer si hebben oec den mensche ghelaten dat ghedencken van haerre sotheit: so dat si niet en hadden moghen sijn verborghen in dien dinghen daer si in sondichden.

9

Want die wijsheit die die ghene van pijnen verloste die haer behouden

10

die wijsheit beleiden den gherechtighen iacob die daer vluchtich was in des brueders gramscap doer gherechtighe weghen: ende si toenden hem gods rike: ende si gaf hem die conste van den heilighen. Si maecte dien eersaem inder pijnen: ende si veruolde sine pine

11

Inder gheenre quaetheit dien omme ghinghen was si bi hem: ende si maecten eersaem.

12

Si wachte dien vanden vianden: ende vanden verleiders beschermde si hem. Ende si gaf hem enen starcken strijt om dat hi verwinnen soude: ende hi weten soude dat die wijsheit machtigher is dan alle dinc.

13

Die wijsheit liet dien gherechtigen ioseph niet vercopen: mer si verlosten vanden sonders: ende si ginc mit hem neder in die cule.

14

ende si en lieten inden banden niet: voer dat si hem toe brochte die heerlijcheit vanden rijcke. ende macht teghen die ghene dien verdructen: ende sie tonetse loghenachtich

[p. *268]

die ghene diese besmetten: ende si gaf hem die ewighe claerheit.

15

Dese wijsheit verloste dat gerechtighe volc ende tsaet dat sonder beclaghen was vanden gheslachte diese verdructe.

16

Ende si ghinc in gods knecht moyses ziele: ende hi stont teghens veruaerlike coningen in wonder ende in teykenen.

17

Ende si gout den gherechtighen kinderen van israhel den loen van haerre pijnen: ende si leide di wt in wonderliken wech. Ende si was hem in bedecsel des daghes: ende des nachts in lichte der sterren.

18

Ende si droech die doer die rode zee: ende leedse doer veel waters.

19

Mer hare vianden verdrencten in die zee der hellen: ende van der hoocheit leid sijse wt. Daer om namen die gherechtighe der quader roef:

20

ende si songhen here dinen heiligen name: ende die verwinnersse dijn hant loefden si te gader

21

Want die wijsheit ondede der stommen mont: ende der kinder tonghe maecte si wijs.