Bible in duytsche (Delftse bijbel 1477)

§ Ca .ix.

1

Mijnre vaderen god ende heer der ontfermherticheit. die alle dinc hebste ghemaect mit dijnen woerde:

2

ende di bi dijnre wijsheit settes den mensche. om dat hi heerscappen soude bouen alle creaturen die van di ghemaket sijn.

3

om dat hi sal betrecken die rontheit vander werelt in effenheit ende in gerechticheit. ende om dat hy sal oerdelen dat oerdel in gherechticheden ende inder beleidinghe van herten:

4

ghif mi die wijsheit di bistaende is dijnen zetele: ende en wil mi niet versteken van dinen kinderen

5

want ic bin dijn knecht ende een soon dijnre deernen. Een cranc mensche ende van cleynen tiden: ende te ionc van verstandenisse ende vanden vonnissen ende vanden wetten.

6

Ende so wie volmaect sal sijn onder der menschen sonen ist dat hem ghebreect dijne wijsheit. hij sal te nyete worden gheacht.

7

Du heues mi ghecoren enen coninc van dijnen volke: ende een rechter van dijnen sonen ende van dinen dochteren.

8

Ende du seitste mi te stichten enen tempel in dinen heilighen berch: ende een outaer inder stat dijnre woninge: die ghelikenisse dijns heilichs tabernakels dattu voer bereet hebtste vanden beghinne.

9

ende mit di is die wijsheit die dijn werck bekent: die welke datter oec doe mede was als du makesde den omrinc der werelt. ende wiste dat bequame was dijnen oghen: ende wat recht was in dinen gheboden.

10

Sende die van dinen heilighen hemelen. ende sentse vanden zetelen dijnre grootheit dat si mit mi si ende mit mi arbeide: dat ic weten mach wat bequaem is voer di.

11

Want si weet ende verstaet alle dinc ende si sal mi soberlijc leiden in mijnen wercken: ende si sal mi wachten in haer macht.

12

Ende mijn wercken sullen bequaem sijn: ende ic sal dijn volc gherechtitheit setten: ende ic sal waerdich sijn mijns vaders zetelen.

13

Want wat mensche mach weten gods raet? Of wie mach pensen wat god wil?

14

Want der sterfliker gepensen sijn vresende: ende onse voersienicheden sijn onseker.

15

Die lichame die te broken wort bezwaert die ziele: ende

[p. *267]

die aertachtighe inwoninghe verduwet den sin die veel dinghen penset.

16

Ende wi bekennen mit pinen die dinghen die in die aerde sijn: ende die in dat aenscouwen sijn vinden wij mit pinen. Mer wie sal dan vergronden die dinghen die inden hemel sijn?

17

Want wie sal dijnen sin weten ten si dattu gheues wijsheit. ende dattu sendes dijnen heilighen gheest vanden hoechsten:

18

ende aldus sijn ghebetert der gheenre weghen die in der aerden sijn. ende die menschen hebbense gheleert die di bequaem sijn.

19

want bi wijsheden sijn ghesont gheworden alle die ghene die di behaechden here van den beghinne