Bible in duytsche (Delftse bijbel 1477)

§ Ca .vij.

1

IC bin oec een sterflijc mensche allen menschen ghelijc: ende van aertschen geslachte des geens die voer gheformeert is: ende ic was vleysch geformeert in mijnre moeder buuc:

2

den tijt van thien maenden wort ic te gader vergadert inden bluede. van eens mans sade: ende vander ghenoechte

[p. *264]

des slaeps die betaemde.

3

Ende als ic gheboren was so ontfinc ic die ghemeen lucht: ende viel oec neder in die gemaecte aerde: ende ic liet wt die eerste stemme ghelijc alle menschen al wenende.

4

Ende ic wort gheuoet ende in doken gewonden: ende ic wort voert ghebrocht mit groter sorghen.

5

Want nyemant vanden coninghen en hadde ander beghin der gheboerten.

6

Hier om is alleen een incomen toten leuen: ende enen gheliken wtganc.

7

Om dit soe wenschede ic. ende mi wort sin ghegeuen: ende ic anriep: ende in mi quam die gheest der wijsheit.

8

Ende ic voersettese bouen den rike ende den zetelen: ende ic seide dat die rijcheden niet en waren teghen haer te rekenen noch te prisen.

9

Noch ic en prijsde haer ghenen preciosen steen ghelijc: want alle gout teghen haer te rekenen is een clein sadekijn: ende men sal dat siluer achten ghelijc modder in haren aenscouwen

10

Bouen salicheit ende ghedaente so minde ic die wijsheit: ende ic settede voert die te hebben voer dat licht: want haer licht is onverblusschlijc.

11

Want mi quam oec alle gueden te gader mit haer: ende onuertellijc eersaemheit bi haren handen.

12

Ende ic bin verblijt in allen: want dese wijsheit ghinc voer mi: ende ic en wiste niet dat si moeder is van allen guede.

13

Ende ic leerdese sonder geueinstheit: ende sonder hatye soe deel ic mede van haren guede: ende haer eersaemheit en verberch ic niet.

14

Want sij is een ongheeindet scat den menschen: ende soe wie vanden scatte oerbaren. die worden deelachtich ghemaect van gods vrientscappe: gheleent om die ghiften van disciplinen.

15

Want god gaf mi te segghen die sentencien. ende niet te veinsen van dien waerdighen dinghen vanden ghenen die mi worden ghegheuen: want hi is die beleider vander wijsheit: ende verbetere vanden woerden.

16

Want in sijn hant sien wi oec ende onse redene: alle wijsheit ende disciplinen vanden werken drr wetenheit.

17

Want hi heeft mi ghegheuen ghewarighe conste van dien dingen die sijn: om dat ic sal weten die ordinancie vander werlt rontheit. ende die crachten vanden elementen:

18

dat begin ende dat einde ende dat middel vanden tiden. die verwandelinghe vanden elementen. ende dat einde der tiden. ende die verwandelinghe vanden zeden: ende ghedeeltheit vanden tiden.

19

die loop vanden iaren. ende die ordinancien vanden sterren.

20

die naturen vanden dieren. ende die gramscap vanden beesten: ende die cracht vanden winden. ende der menschen ghepeinsen. die onderschidenheit vanden bomen. ende die cracht vanden wortelen:

21

ende alle dingen die verburghen sijn ende onghesien heb ic gheleert. Want die werker van allen dinghen heeft mi gheleert wijsheit

22

Want die wijsheit is die gheest der verstandenisse. heilich. enich. menichfoudich. subtijl. berurende. welsprekende. onbesmet. seker suete. guet. minnende. scarp. die niet en verbiet wel te doen.

23

menschelijc. guedertieren. ghestadich. ghewarich. seker: hebbende alle duecht. alle dinc voersiende: ende alle dinc verstandeliken gheeste ontfaet: suuer. subtijl.

24

Want die wijsheit is beruer-

[p. *265]

liker: dan alle beruerlike dingen. Want si ghenaect allesins in haer suuerheit

25

Want si is die hette van gods cracht: ende si is een oueruloedicheit vandes almachtighen gods claerheit: si is suuer daer om en comt niet besmets in haer.

26

Want si is dat blincken vanden ewighen licht een spieghel van gods moghentheit sonder smette: ende dat beelde sijnre guetheit.

27

Ende al is sij een. si vermach alledinc: ende in haer seluen bliuende. soe vernuwet si alle dinc: ende si draecht haer ouer doer die gheslachten in die heilighe zielen. Si settede gods vrienden ende die propheten.

28

Want god en mint niemant sonder dien: die mitter wijsheit is.

29

Want die wijsheit is duerbaerre dan die sonne: ende si is bouen alle die ordinancien vanden sterren. teghen dat licht ghepresen so vintmense eerst.

30

Want naden lichte volghet die nacht: mer die wijsheit verwint die quaetheit