Bible in duytsche (Delftse bijbel 1477)

§ Ca vi

1

BEter is die wijsheit dan cracht: ende een vroet man meer dan een starc.

2

Coninghen hoert hier omme ende verstaet: leert ghi rechters vanden einden der aerden.

3

Gheeft die oren gi die menichte onthout. ende die v bequaem sijt inden scaren vanden gheslachten:

4

want v luden is macht ghegheuen van den here. ende die cracht vanden alren hoechsten: die welke uwe werken sal vraghen ende uwe ghepensen ondersoken:

5

want als ghi bewaert die dingen van sinen rike. so en oerdelde ghi niet gerechtelijc. noch en bewaerde niet die wet des rechtuaerdicheits: noch en wanderde niet

[p. *263]

na gods wille.

6

Veruaerlijc ende haestelijc sal hi op v openbaeren: want alte herden vonnisse sal gheschien inden genen die bouen sijn.

7

Want den cleinen verleentmen die ontfermherticheit: mer die machtighe sullen grote tormenten doghen

8

Want die heer en sal nyemants persoen wtnemen die alre dinc heer is. noch die heer en sal nyemants grootheit ontsien: want hi heeft die clyne ende die grote ghemaect: ende van allen is hem die sorghe gelijc.

9

Want den starcsten so naect den starcsten torment.

10

Daer om sijn dese mijn reden tot v ghi coningen: om dat ghi sult leren vroetscap: ende dat ghi niet en moet ontuallen.

11

Want die ghene die die gherechticheit hebben gewacht: si sullen gherechtelijc worden geoerdelt: ende die gherechtige dinghen hebbe geleert. sij sullen vinden wat si antwoerden sullen.

12

Hier om begeert mijn reden mintse: ende ghi sult discipline hebben.

13

Die vroetscap is claer die nemmemeer en verdeluet: ende sij wort lichtelijc ghesien vanden genen diese minnen: ende si wort lichtelijc gesien vanden ghenen diese soken.

14

Si veronledicht den ghenen die haer begheren: om dat si haer hem luden eerst sal tonen

15

Die vanden lichte tot haerwaert waken sal hi en sal niet pinen: want hi salse vinden sittende voer haer doren

16

Daer om ist een guet sin tot haerwaert te dencken: ende die om haer waect hi sal haestelijc seker wesen.

17

Want si ommegaet sokende die ghene die haers waerdich sijn: ende in horen wegen soe thoent si haer den ghenen blidelijc: ende in alre voersienicheit so loopt si hem te ghemoete.

18

Want haer beghin is die alre waerachtichste begheerte van discipline.

19

Ende die minne is die wachter vander disciplinen gheboden. Mer die wachtinghe vanden geboden is dat einde sonder ghebreclicheit:

20

ende sonder ghebreken wesende duet gode naest sijn.

21

Ende die begheerte van wijsheden leidet aldus ten ewighen rike

22

Hier om ghi coninghen des volcs ist dat ghi genoecht hebt inden eerliken zetelen ende inden rike ende inder voerbarichede: so mint die wijsheit op dat gi eweliken moecht regneren.

23

Mint dat licht vander wijsheit: ghi alle die bouen dat volc sijt.

24

Want wat die wijsheit is ende hoe si gemaket was sal ic segghen. ende ic en sal v niet berghen gods sacramenten: mer ic salt ondersoken van beghinne der geboerten: ende ic sal haer consten setten intlicht. ende ic en sal die waerheit niet ouerliden:

25

noch ic en sal ghenen wech hebben mitter nydicheit: want sulke menschen en sal der wijsheit niet deelachtig sijn.

26

Want die menichte vanden wijsen. is ghesontheit der werelt: ende een wijs coninc. is des volcs vasticheit.

27

Hier om ontstaet discipline bi minen redenen: ende si sal v vorderen