Bible in duytsche (Delftse bijbel 1477)

§ Capittel .iiij.

1

HHoe schoen is een snuer geslachte mit caritaten. Want haer gedencken is ontsterfelic: want het is bekent voer gode ende voer die menschen.

2

Alst teghenwoerdich is so volghen si hem na: ende begherent. alst haer wtghebrocht heuet: ende den seghe houdet gecroent inden eweliken: het ghewint den loen inden onbesmetten stride.

3

Mer die veel ghewonnen vanden quaden en sal niet oerbaerlijc wesen: ende die basterdighe scoten en sullen ghene hoghe wortelen gheuen: noch si en sullen gheen gestadighe vasticheit maken.

4

Ende ist dat si inden tellighen in enighen tide groeyen. ende om dat si onuaste staen soe sullen si worden beruert vanden winde: ende si sullen worden ontwortelt vanden ouerlast vanden winde.

5

Want die onuolmaecte telgheren sullen worden te broken: ende haer vruchten sullen wesen onnutte ende bitter te eten: ende nerghent toe bequaem.

6

Want alle die kinder die worden gheboren vanden ongherechtighen. sijn ghetughe vander quaetheit teghen vader ende moeder in haer vraghen.

7

Mer ist dat die gherechtige wort veronlediget mitter doot. soe sal hi in becoelinghe sijn.

8

Want die outheit is eersaem: niet lange duerende: noch ghetelt mit ghetale van iaren.

9

Mer des menschen sinnen sijn graeu

[p. *261]

ende die tidicheit vander outheit is een onbesmet leuen.

10

Die gode genoechde hi is vercoren ghemaeckt: ende leuende onder die sondaren hi is overgeuoert.

11

Ende hi is genomen om dat hi die quaetheit sijnre verstandenissen niet en soude verwandelen: noch dat die quaetheit der geueinstheit sine ziele oeck niet bedrieghen en soude.

12

Want die vergaderinghe van loghenachticheden verdonckert dat guede ende die onghestadicheit vander begheerten verkeert den sin sonder quaetheit:

13

in corter tijt voleyndet soe voldede hi veel tiden.

14

Want sijn ziel was gode bequaem: daer omme so haestede hi dien wt te leiden van tmidden der quaetheden. Mer dat volc en sach niet noch en verstonts niet. noch en leide sulke dingen niet omtrent haer herten.

15

want gods gracie ende sine ontfermherticheit is in sinen heilighen: ende dat aenschouwen op sijn vercoornen.

16

Want die gherechtige doden verdoemt die leuende quade: ende die ioncheit die haestelijc eindet die verdoemt een ongherechtighen. langhe leuen

17

Want si sullen een wijs eynde sien: ende si en sullens niet verstaen wat god van dien heeft gepenst: ende waer om datten die here gheminret heeft.

18

Want si sullen sien ende versmaden hem: mer die here sal se bespotten.

19

Ende hier na sullen si nedervallende sijn sonder eer: ende ewelijc sullen si sijn in scanden onder die doden. Want hij sal verderuen sonder stemme die houaerdighe: ende hi sal hem berueren vanden fondamente: ende tot bouen sullen sij worden bedroeft. Ende si sullen sijn suchtende: ende haer ghedencken sal veruaren.

20

Si sullen comen al veruaert inden ghepense vnn hare sonden: ende haer quaetheden sullen die wroghen vander weder pertyen.