Bible in duytsche (Delftse bijbel 1477)

§ Capit .iij

1

MEr gherechtigher zielen sijn in gods hant: ende die tormenten der doot en sal die niet roeren.

2

Si sien ghesien steruende vander onwiser oghen: ende men achte haer wtganc quellinghe. Ende vanden gerechten weghe ghinghen si wech in die doot.

3

ende dat van ons is een wech des doots Mer sij sijn in vreden.

4

Ende ist dat sij tormenten gedoecht hebben voerden menschen: so is haer hoop vol ontsterflicheden.

5

In luttel sijn si ghequellet: mer in velen sullen si wel worden ghesadet. Want god beroerdese: ende vantse sijns waerdich.

6

Ghelijc den goude inden fornayse so proefde hi die: ende ontfincse als een hostie des holocausten:

7

ende inden tiden sal sijn haer aenscouwen die gherechtighe sullen blincken. ende lopen als voncken in dat riet.

8

Ende si

[p. *260]

sullen oerdelen die gheslachte. ende sullen heerscappie hebben bouen den volke: ende haer god sal regneren in ewicheit.

9

Die in dien gelouen sullen die waerheit verstaen: ende sullen hem mede rusten die ghetrouwen inder minnen: want het is ghifte ende vrede sinen wtuercoren.

10

Mer die quade sullen hebben berispinghe na dat si ghedocht hebben: die den gerechtighen verrokeloesden: ende ghingen wech vanden heer.

11

Want die wijsheit ende die discipline ofwerpt hi is onsalich: ende haer hope is ydel: ende haer pine sonder vrucht: ende haer werken sijn onnutte Ende si sijn vanden rechten weghe wech ghegaen in die doot.

12

Haer wiuen sijn dwaes: ende haer kinder sijn alte quaet. Vermaledijt is haer creatuer.

13

Want die ondrachtige is salich ende die niet besmit en is die welke niet en wisten dat bedde in misdaden Si sal hebben vrucht inden aenscouwen der heiligher zielen.

14

Ende een ghelubde. die gheen quaetheit en heeft gewrocht mit sinen handen: noch gheen alte quade dinghen en heeft gepenst teghen gode. Want men sal dien gheuen die wtuercoren ghiften des loons ende een alte bequamen loth in des heren tempel.

15

Want van gueden werken is die vrucht glorioes: ende die wortel der wijsheit die niet en ontualt.

16

Want der ouerspeelres kinder sullen wesen in verderffenisse: ende vanden ongherechten bedde sal dat saet worden verderft.

17

Al ist oec dat si van langen leuen sullen wesen. si suelen te niet worden gherekent: ende haer leste outheit sal sijn sonder eer.

18

Ende ist dat si haestelijc steruen. so en sullen si geen hope hebben: noch toe sprekinghe inden daghe der bekennisse.

19

Want die verderfnisse vanden ongherechtighen gheslachte is swaer