Bible in duytsche (Delftse bijbel 1477)

§ Ca .vij.

1

WAt suldi sien in die sunamiten: anders dan vergaderinghe van scaren. Hoe schone sijn dijn ganghen inden ghescoeyte: prin cen dochter. Die vergaderinhe van uwen dyen. is als en hecsel: dat gesmedet is vander hant eens wercmans.

2

Dijn nauel is als een gedraeyt cop: ende nemmermeer ghebrec hebbende dran c. Dijn buuc is als een hoop tarwen: ommeset mit lelyen.

3

Dijn twee borsten als twe hindekijns eenre gheyten te gader ghedraghen.

4

Dijn hals als een yuorie toren: dijn oghen als die piscine in esebon: die welke sijn in poorte der dochteren van menichten. Dijn nose is als een toren van lybani: die welke scouwet teghen damascum.

5

Dijn hooft is als carmelus: ende die haren dijns hoofts als eens conincs purpur gheuoghet int ploeyen

6

Hoe schone bistu. ende hoe chierlic alre liefste in weeldicheden

7

Dijn lancte is ghelijc der palmen: ende dijn borsten den druuen.

8

Ic seide: ic sal op climmen opten palmboem: ende begripen sine vruchten. Ende dijn borsten sullen worden als druuen des wijngaerts: ende die roke dijns monts als der appelen:

9

dijn kele als die alre beste wijn waerdich minen gheminden te drincken: ende sijn lippen ende sijn tanden te eercauwen.

10

Ic minen gheminden. ende tot mi is sinen bekeren.

11

Com mijn gheminde gae wi wt inden acker: laet ons geduren inden dorpen:

12

stae wij vroech op ten wijngaerden: ende besien wi of die wijngaert ghebloeyt is. of die blomen vruchten brenghen: of die appele garnate ghebloeyt sijn. Daer sal ic di geuen mijn borsten.

13

Die mandragoren hebben haer

[p. *257]

roken ghegeuen in onsen poorten. Mijn gheminde ic hebbe di ghehouden alle die appelen oude ende nyeuwe