Bible in duytsche (Delftse bijbel 1477)

§ Ca .viij

1

WYe sal mi di gheuen te sien minen brueder die sukende biste die borsten mijnre moeder: op dat ic di daer buyten alleen vinden mach ende di mach cussen. ende dat mi te hant nyemant en versmade?

2

Ic sal di begripen ende leyden in mijnre moeder huys: ende in die slaepcamer mijnre wintster. Daer sul di mi leren: ende ic sal di dranc geuen van ghemaecten wijn: ende most mijnre garnaet appelen.

3

Sijn luchterhant onder mijn hoeft: ende sijn rechterhant sal mi ommehelsen.

4

Ic besweer v dochteren van iherusalem: dat ghi niet en wect die gheminde noch en duet ontwaken: tot datse selue wil.

5

Wye is dese die opuaert vander woestinen oueruloeyende van weeldicheden: geneyget op haren gheminden? Onder enen quaden mastboem verwecte ic di: daer is werck dijnre moeder: daer is dijn winster besmet.

6

Set mi als een teyken op dijn herte. als een teyken op dijn arm: want die minne is starc als die doot hart als die helle. Haer lampen sijn als lampen van vyere ende van vlamme

7

Vele wateren en sullen niet moghen wtdoen die minne: noch die vloeden en sullense niet moghen ouerwerpen. Al gheeft een mensche alle die substancie van sinen huys om minne: hi salt veronwaerden als niet

8

Onse suster is cleyn: ende en heeft gheen borsten. Wat sullen wi onse suster doen: in dien daghe wanneermen haer ansprekende is?

9

Ist dat si een muer is. stichten wi op haer silueren voergheburcht. Ist dat si een door is: besniden wijse mit cederen tafalen.

10

Ic bin een muer ende mijn borsten als een toerne: van dien ic bin gemaect voer hem als vrede vindende.

11

Den vreedsamen was een wijngaert: in haer die welke heuet volc. Hi leuerde hem den huederen: een man brenct om sijn vrucht dusent silueren penninghen.

12

Mijn wijngaert is voer mi. Dine dusent vreetsamen: ende twe hondert die sine vrucht hueden.

13

Die wones inden hof dijns vrients: hoer die wandertste inden houe die vrienden horen nae di: doe mi horen dine stemme.

14

Vlie mijn gheminde: ende worde ghelijc der geiten ende der herten hindekijn. opten berch van specien

§ Hier gaet wt cantica canticorum