Bible in duytsche (Delftse bijbel 1477)

§ Capittel .vi.

1

MIne gheminde is neder gegaen in sinen hof ter tafelen mitter specien: dat hi worde gheuoedet inden

[p. *256]

houe ende vergaderde lelyen.

2

Ic minen geminde: ende minen gheminden mi: die geuoet wort onder die lelyen.

3

Du biste schoene mine vriendinne: suet ende ghechiert als iherusalem: veruaerlic als een gheordineert heer vanden getelden

4

Keer of dijn oghen van mi: want sij hebben mi of doen vlieghen. Dijn haer sijn als een cudde van gheyten: die openbaren van galaad.

5

Dijn tanden sijn als een cudde der scapen: die opghecomen sijn vten bade Alle van dubbelder dracht ende gheen ondrachtich en is in hem.

6

Ghelijc der kerlen van eenre garnaten appel. also sijn dijn wangen: al sonder datter van binnen verborghen is

7

Tsestich sijn der coninghinnen: ende tachtich der vriendinnen: ende der ioncfrouwen en is gheen ghetal

8

Een is mine duue mine schone volmaecte: een is haer moeder: wtuercoren haer moeder diese wan Die dochteren van syon saghense. ende predictense alre salichste: die coninghinnen ende die vriendinnen: ende si loefdense.

9

Wie is dese die voertcoemt als oprisende dageraet: schone als die mane. wtvercoren als die sonne. veruaerlijc als een gheordineert heer.

10

Ic ghinc neder inden hof der noten op dat ic saghe die appelen vanden dalen: ende om te sien of die wijngaert gebloeyt was: ende of die appelen van garnaten gegroeyt waren.

11

Ic en wists niet Mine ziele verstoerde mi: om aminadaps quadrighen

12

Keer weder keer weder ioncfrou van syna keer weder keer weder. dat wi di moghen aenscouwen