Bible in duytsche (Delftse bijbel 1477)

§ Ca v.

1

Mijn gheminde coem. in sinen hof: dat hi ete die vrucht van sinen appelen. Com in minen hof mijn suster mijn bruut: ic hebbe ghemaeyt mijn mirre mit mijnre specien. Ic heb gegeten mijn honich met melc. Eet mijn vrienden ende drinct: ende wort droncken mijn alre liefste

2

Ic slaep: ende mijn harte waect. Die stemme mijns ghemindes clopt. Doet mi op mijn suster. mijn vriendinne. mijn duue. mijn onbesmette: want mijn hoeft is vol douwes: ende mijn vlechten vol dropelen vander nacht.

3

Ic hebbe minen rock wtghedaen: hoe sal icker weder mede worden ghecleet? Ic heb mijn voeten ghewasschen: hoe sal icse weder vuyl maken?

4

Mijn gheminde liet sijn hant doer een gat: ende minen buuc verscoot te sinen tasten.

5

Ic stont op dat ic op dede minen gheminde. Mijn handen si dropen van mirren: ende mine vingeren waren vol vander bester gheproefder mirren.

6

Ic hebbe op gedaen die clincke van mijnre doren minen geminden: ende hi was ofgekeert ende ouerleden Mijn ziel versmeltede. doe mijn gheminde sprac. Ic sochte hem ende ic en vants niet: ic heb geropen: ende hi en heeft mi niet gheantwoert.

7

Die wachters vonden mi omtrent die stat gaen. Si sloghen mi ende wonden mi: die wachters der mueren namen mi minen mantel.

8

Ic bezweer v dochteren van iherusalem. Ist dat ghi vint minen geminden. dat ghi hem boetscapt: want ic van minnen quelle.

9

Hoedanich is dijn geminde vanden gheminden: o alre schoenste der wiuen? Hoe ghedaen is dijn geminde vanden gheminden: want du ons aldus bezweertste?

10

Mijn gheminde is wit blinckende ende root blosende: wtuercoren wt dusentighen.

11

Sijn houet is als dat alre beste gout: sijn haer is als die ouerste scote vanden palmboem: zwart als die rauen.

12

Sijn oghen sijn als die duuen op die riuieren der wateren die ghedwoghen sijn mit melke: ende die sitten neuens alle volle riuieren.

13

Sine wanghen sijn als een effen tafel mit specien: die ghemaect is van speciers. Sijn lippen sijn als lelyen die neder drupen die eerste mirre.

14

Sine handen sijn gulden gedraeyet: vol iacincten. Sijn buyc is yuoren: onder beset met saphiren.

15

Sine benen sijn marmoren calumpnen: die ghefondeert sijn op gulden voeten. Sijn ghedaente is als lybanus: wtuercoren als die cedar.

16

Sijn keel is alte suet: ende altemael is hi begheerlic. Dustanich is mijn gheminde: ende hi is mijn vrient dochteren van iherusalem.

17

Werwaert is wech ghegaen dijn gheminde o du schoenste van wiuen: werwaert is neder gegaen dijn gheminde? Ende wi sullen metti soken.