Bible in duytsche (Delftse bijbel 1477)

§ Ca iiij

1

HOe schone bistu mine vriendinne: hoe schoen bistu. Dijn ogen sijn als der duuen oghen: al sonder dat daer binnen verborghen is. Dijn haer als cudden van gheyten: die opcomen van den berghe van galaad.

2

Dijn tanden sijn als cudden ghescoren der scapen: die opcomen sullen vanden wasschen. Sij sijn alle mit twe drachten: ende onder hem en is gheen ondrachtich.

3

Als een rode huue sijn dine lippen: ende dine spraec is suet. Als een ghebroken appel van garnaten also sijn dijn wanghen: al sonder datter van binnen verborgen is.

4

Dijn hals is als dauids toren: die gesticht is mit voergheburchten. Wt hem hanghen dusentich schilden: ende alrehande wapenen der starcker.

5

Dijn twe borsten sijn als twe hindekijns eenre twidrachtigher gheyten: die daer gheuoet worden onder die lelyen:

6

tot dat dien dach op gaet. ende die scaduwen gheneyghet worden. Ic sal gaen ten berghe van mirren: ende totten houelen des wieroecs.

7

Du biste altemale schone mijn vriendinne: ende gheen vlecke en is in di.

8

Coemt van lybano mijn bruut: com van lybano coomt. Du sulste ghecroent worden vanden hoefde van amana vanden toppe van sanir ende hermon: vander leuwencule. vanden berghen der lupaerden

9

Du hebste ghewont mijn herte. mijn suster mijn bruut: du hebste mijn hert ghewont in een van dinen oghen ende in een haer van dinen hals.

10

Hoe schoen sijn dijn borsten mijn suster mijn bruut dijn borsten sijn schoenre dan wijn: ende die roke dijnre saluen bouen alle specien

11

Een drupende honichrote sijn dijn lippen bruut: honich ende melc is onder dijn tonghe: ende die roke dijnre clederen is als roke van wyeroec.

12

Du biste een besloten hof mijn suster mijn bruut: du biste een besloten hof. ende een gheteykende fonteyn.

13

Dijn wtsendighe sijn een paradijs van appelen van garnaten mitter appelen vruchten: cyper mit nardo.

14

nardus ende sofferaen: fistula ende caneel mit alle den houte van lybano: mirra ende aloes mit alder eer-

[p. *255]

ster salue.

15

Der houen fonteynen putten vanden leuende wateren: die mit bedrusche vloeyen vten lybano

16

Stant op van noerden wint ende com du zuden wint: ende doerwaeye minen hof: ende die welrukende cruden sullen vloeyen.