Bible in duytsche (Delftse bijbel 1477)

§ Capittel .iij.

1

EEn welken die mine ziele mint socht ic des nachts in mijn bedde. Ic sochte hem: ende ic en vants niet

2

Ic sal opstaen ende ommegaen die stat al doer die weghen ende straten: om te soken den ghenen die mine ziele mint. Ic sochten: ende ic en vants niet.

3

Die wakers die die stat hoeden vonden mi. En hebdi niet ghesien den ghenen die mine ziele mint?

4

Als ic een luttel gheleden was: so vant ic hem den welken mine ziele minnet. Ic hielten ic en sals niet laten gaen: tot dat ic hem geleit sal hebben in mijn-

[p. *254]

re moeder huus: ende in die slaepcamer mijnre winster.

5

Ic besweer v dochteren van iherusalem biden gheyten ende biden herten vanden velden: dat gi niet en wecket noch en duet ontwaken mijn gheminde: voer dat si selue wil.

6

Wie is dese die daer opclimmet bider woestinen. als een ruedekijn roekes van mirren ende van wieroec: van alden crude ghepuluert van enen crudenaer?

7

Ende dat bedde salomons ommngaen tsestich starcke. vanden alren starcsten van israhel:

8

alle haer zwaerde houdende: ende ten stride wel gheleert. Eens ygelijcs zwaert op sijn dye: om die nacht vrese.

9

Die coninc salomon maecte tot sijnre behoef enen troen van houte van lybano.

10

sine colummen maecte hij silueren. ende die lenen gulden. den opganc purpuren. dat middelste beleide hi mit caritate: om die dochteren van iherusalem

11

Coemt wt ende besiet dochter van syon den coninc solomon in sinen croen: daer hem sijne moeder mede croende inden daghe sijnre brulochte: ende inden dage sijnre herten blijscappen