Bible in duytsche (Delftse bijbel 1477)

§ Capit .ij.

1

IC bin een blome des veldes: ende een lelie der dalen.

2

Als een lelie tusschen den doornen: also is mijn vrindinne onder die dochteren.

3

Als die mast onder die houten der busschen: alsoe is mijn lief onder die sonen. Ic sat onder die scaduwen des gheens die ic begeerde: ende sijn vruchte was suet mijnre kelen.

4

Die coninc leide mij in sijn wijnkelre ende hi ordineerde in mi caritate.

5

Verciert mi mit blomen. ende beset mi mit masten: want ic quelle van minnen.

6

Sijn luchter hant is onder mijn hoeft. ende sine rechter hant sal mi ommehelsen.

7

Ic besweer v dochteren van iherusalem. biden gheyten ende biden herten vanden velde: dat gi niet en wecket noch en doet ontwaken mine vriendinne: voer dat si selue wil.

8

Die stemme mijns ghemindes. Siet hij comt springhende inden berghen: ouerlidende die houelen.

9

Mijn lief is ghelijc der gheyten ende eenre hinden der herten Sich hi staet achter onse wech. ende siet doer die vensteren: ende doer die tralyen.

10

Ende sich mijn gheminde spreect mi an. Stant op com naerre mijn vriendinne. mijn duue. mijn schone ende coemt.

11

Want thans is die winter ouergheleden: den reghen is wech ghegaen.

12

Die blomen openbaren in onsen lande: die tijt des snuyens is ghecomen. Die stemme der tortelduuen is ghehoert in onsen lande:

13

die vigheboem heeft ghebrocht sijn eerste vrucht: die bloeyende wijngaert heeft ghegeuen sijnen roec. Stant op mijn vriendinne mijn herde schone ende coemt

14

mijn duue in die gaten vanden stenen: inden holen vanden mueren. Toen mi dijn aenschijn: dijn stemme ludet in minen oren Want dijn stemme is suet: ende dijn aenschijn is schoen.

15

Vaet ons die cleyne vossekijns: die welke den wijngaert verderuen. Want onse wijngaert heeft gebloeyt.

16

Mijn gheminde mi ende ic hem: die gheuoedt wordet onder die lelyen:

17

tot dat die dach opgaet. ende die scadue ondergaet. Keert weder: ende weest ghelijc mijn gheminde der geyten ende der hinden der herten: opten berch van bethel.