Bible in duytsche (Delftse bijbel 1477)

§ Capittel .ix.

1[9:1b]

GHerechtighe ende vroede sijn. ende haer wercken sijn in gods handen. Nochtan en weet een mensche niet weder hi waerdich is der minnen of der haten gods:

2

Mer alle dinghen worden onseker ghehouden tot inden toecomenden tiden: om dat alle dinc effen ghelijc gheschien sal den gherechtighen ende den nydighen: ende den gueden ende den quaden. den suueren ende den onsuueren: den ghenen die offerhande offert: ende den ghenen die sacrificie veronwaert. Ghelijc den gueden also is oec die sondaer: gelijc den versworen also is oec die waer sweert.

3

Dits dat alre quaetste onder ander dinghen die onder die sonne geschien want eenrehande dinc gheualt hem allen Waer bi datter menschen kinder herten worden veruolt mitter quaetheden ende mit versmaden in haren leuen: ende hier na sullen si worden gheleyt ter hellen.

4

Niemant en is die altoes sal leuen ende die in desen dinc mach hebben betrouwen. Beter is een leuende hont dan een doot leeuwe.

5

Die leuen si weten dat si steruen sullen: mer die doden en weten niet meer. Noch si en hebben voert meer gheen loon: want haer gedencken is der verghetelheit ghegheuen

6

Oec soe sullen te gader veruaren die minne ende die hatye ende die nijt: noch si en hebben gheen deel in deser werlt: noch inden werke datmen onder die sonne duet.

7

Daer om ganc ende et dijn broot in vruechden: ende drinc mit vruechden dinen wijn: want gode ghenoghen dine wercken.

8

In allen tiden so moeten dine clederen blickende sijn: ende die olye en moet niet ghebreken dinen hoefde.

9

Werde ghebrukich inden leuen mitten wiuen dien du minnes. alle die daghen vanden leuen dijnre onghestadicheit: si sijn die di ghegheuen sijn onder die sonne alden tijt dijnre ydelheit. Want dit is dijn deel in dijn leuen: ende in dijnre pinen daerstu in pijnste onder die sonne

10

So wat dijn hant mach doen: werc naerstelic: want noch werck noch reden noch const noch vroetscap en sullen ter hellen sijn: derwert du tides.

11

Ic keerde mi tot anderen dinghen: ende ic sach onder die sonne. datter snelre den loop niet

[p. *250]

en is. noch der starcker den strijt. noch den vroeden dat broot. noch die rijcheden der leerersnoch die gracie der wercluden: mer tijt ende gheual in allen.

12

Een mensche en weet sijn einde niet: mer ghelijc dat die visschen worden geuaen mitten henghel. ende alsomen die voghele grijpt mitten stricke. alsoe worden die menschen geuaen in quade tiden: als hi hem haestelijc op coemt.

13

Dese vroetscip sach ic oec onder die sonne: ende ic proefdese die alre grooste

14

Een cleyn stat: ende luttel mannen daer in. Ende teghen haer quam een groot coninc ende omsettese: ende stichtede versekerheit al omme: ende die omlegghinge was volmaect

15

Ende men vant in die stat enen armen man ende vroet: ende hi verlossede die stat bi sijnre vroetscap: ende voertmeer en ghedachte nyemant des arms menschen

16

Ende ic seide dat die vroetscap beter was dan die starcheit Waer om wort des arms mans vroetscap versmaet. ende waer om en hoerdmen sijn woerden niet?

17

Der vroeder woerden worden ghehoert inden ghestillen: meer dan der princen woerden ropende onder den sotten.

18

Beter is vroetscap dan vechtelike wapenen: ende die in enen sondicht. hi sal veel guets verliesen