Bible in duytsche (Delftse bijbel 1477)

§ Capittel .v.

1

SPreec gheen dinc ouerdadelijc noch dijn herte en si niet haestich redene voert te brenghen voer den here. Want god is inden hemel ende du biste opter aerden: hier om sullen dijn reden luttel sijn.

2

Na dromen volghen veel sorghen: ende in veel redenen salmen sotheit vinden.

3

Oftu gode ye hebste gheloeft: soe en beide niet dat te gheldene. Want hem is onbequaem ongetrouwe ende sotte belouinghe. Mer soe wat du beloeft hebste dat ghelde.

4

Want veel beter ist niet te louen: dan die gheloefde dinghen niet te houden ofte ghelden na die belofte.

5

Gif dijnen mont niet datstu dijnen vleysch doetste sondighen. noch en segge niet. voer den enghel en is geen voersienicheit: dat god niet tornich en worde om dijne reden ende scheide alle die wercken van dijnen handen.

6

Daer veel dromen sijn daer sijn veel ydelheden: ende onghetellike reden. Mer ontsie du gode.

7

Ist datstu sietste der armer ouercrachten ende ouerdadighe oerdelen. ende inder prouincien dat oerdel om mekeren: en verwonder dij niet op dese dinghen: want bouen den hoghen: is een ander noch hogher: ende bouen desen sijn ander noch hogher:

8

ende hier en bouen soe ghebiet die coninc van alden landen den ghenen die dient

9

Die ghyerighe en sal niet veruolt worden mit ghelde: ende die rijcheit mint. hi en salre ghene vrucht of nemen. Hier om is dit oec ydelheit.

10

Daer vele rijcheden sijn: daer sijnre vele diese verteren. Ende wat vordertet den besitter: sonder dat hi die rijcheit aen-

[p. *246]

siet mit sijnen oghen?

11

Den ghenen die wert is die slaep soet weder hi luttel of veel eet: mer eens rijcmans satheit en laten niet slapen.

12

Oec is een ander alte quade siecte: dat ic sach onder die sonne. Rijcheden diemen behoudet. teghens haers heren quaet.

13

Want si vergaen: in die alre quaetste quellinghe. Want hi heuet enen soon ghewonnen: die in alten groten verdriet sal wesen:

14

Also hij naect quam wt sijnre moeder buuck also sal hij wederkeren ende hij en sal niet mit hem draghen van sijnen arbeyt.

15

Het is alte male een keytiuighe siecheit. Hoe dat hi quam also sal hij wederkeren. Hier om wat vordertet hem dat hi te vergheefs pijnde.

16

Alle die daghen sijns leuens at hi in duysternissen ende in veel sorghen: ende in armoeden ende in veel siericheden

17

Dus so dochte mi dit guet: dat elc ete ende drincke. ende gebruke blijscap van sijnre pijnen. die hi gepijnt heeft onder die sonne inden ghetale van sijnen leefdaghen. die hem god ghegheuen heeft ende dit is sijn deel.

18

Ende elke mensche dien god heeft ghegheuen rijcheden ende guet: ende heeft hem oec macht ghegeuen dat hi daer of ete. ende dat hi ghebruke van sijn deel ende dat hi verblijde van sine pinen: dits gods gaue

19

Want hi en sal niet ghenoech ghedencken die daghen sijns leuens: om dat god veronledicht sijn herte mit weelden