Bible in duytsche (Delftse bijbel 1477)

§ Ca .iiij.

1

IC keerde mi tot anderen dinghen: ende sach die ouerdaet die men bedrijft onder die sonne. ende der onnoselen tranen ende nyemant en troestese: noch datmen niet en mach haer ouercracht wederstaen der gheenre: die lachter gheset sijn van alre menschen hulpen.

2

Ende oec louede ic meer die doden dan die leuende:

3

ende van desen tween soe oerdele ic die ghene saligher die noch niet gheboren en sijn: ende niet en heeft ghesien die quade daghen die geschien onder die sonne.

4

Echter pensde ic alre menschen pinen: ende ic mercte dat die aernsticheit worden benidet vanden naesten. Daer om is dit oec ydelheit: ende oueruloedighe sorge.

5

Die sot voudet sijn handen te gader: ende eet sijn vleysch ende seit.

6

Beter is een hantuol mit rusten: dan beide handen vol mit pijnen ende mit quellinghe der ghedachten.

7

Al merckende so vant ic oec een ander ydelheit onder die sonne

8

Een mensche is. die ander en heeft gheen kint noch brueder: nochtan en laet hi niet

[p. *245]

te pijnen: sijn oghen en worden niet ghesadet mit rijcheden: noch hi en penst niet segghende. Wien arbeide ic: ende beroue mijn ziele van gode? Hier in is oec ydelheit: ende die alre quaetste quellinghe.

9

Hier om ist beter datter twee te gader is dan een: want si hebben die hulpe haers geselscaps.

10

Ist dat die een valt: hi sal vanden anderen worden onderscoert. Wee den ghenen die allene is: want als hi gheuallen is soe en heeft hi nyemant dyen opheft.

11

Ende ist dat si twee te gader slapen: so sullense onderlinghe worden verwarmt. Hoe sal een moghen verwarmen?

12

Ist dat yemant verwinne enen: si twee wederstaen enen. Een drieuoudich cordekijn breectmen mit pijnen.

13

Beter is een arm wijs kint: dan een out sot coninc. die niet voersien en can wat hem toecomende is:

14

dat onderwilen een wt comt ten rike wt enen kerkere ende wt banden ende dat een ander die int rike gheboren is wort verteert mit verdriet.

15

Ic sach alle die ghenen die leuen: ende die onder die sonne wanderen mitten anderden ionghelinge: die voer hem opstaen sal

16

Onvertelliken is dat ghetal vanden volke ende der gheenre die voer hem waren: ende daer na toe te comen sij en sullen in hem niet worden verblijt. Mer dat is oec ydelheit: ende quellinghe des gheestes.

17

Wacht dinen voet alstu in gods huys gaetste: ende ghenake dattu moghes horen. Want veel beter is gehoersaemheit dan der sotter offerhande die niet en weten wat quaet sij doen.