Bible in duytsche (Delftse bijbel 1477)

§ Ca .iij.

1

ALle dinghen hebben tijt: ende alle dinghen liden ouer onder den hemel mit haren spacien.

2

Het is tijt te worden gheboren: ende tijt te steruen. Tijt te planten: ende tijt te roden dat gheplant is.

3

Tijt te doden. ende tijt te ghenesen. Tijt te stichten: ende tijt te destrueren.

4

Tijt te screyen: ende tijt te lachen. Tijt te springhen: ende tijt te wenen.

5

Tijt stenen te stroeyen: ende tijt te vergaderen. Tijt omme te helsen: ende tijt verre te wesen vander ommehelsinghe.

6

Tijt te winnen: ende tijt te verliesen. Tijt te wachten: ende tijt of te werpen.

7

Tijt te scoren: ende tijt te gader te naeyen. Tijt te swighen: ende tijt

[p. *244]

te spreken.

8

tijt te minnen: ende tijt te haten. tijt van striden: ende tijt van vrede

9

Wat heeft een mensche meer van sijnen arbeit?

10

Ic sach die quellinghe die god der menschen kinder heeft ghegeuen om dat si daer in sullen worden oueruloedich.

11

Alle dinghen maecte hi guet in haren tiden: ende hi heeft die werelt ghegeuen tot haerre prouen. om dat die mensche niet vinden eu sal dat werck dat god ghemaect heeft vanden beghinne tottt eynde.

12

Ende ic bekende dat niet beter en was dan verblijden: ende weldoen in sijnen leuen.

13

Want elc mensche die eet ende drintt: ende guet siet van sijnre pijnen dats gods ghifte.

14

Ic hebbe gheleert: dat alle die werken die god ghemaect heeft. ghedurich sijn eweliken. Wi en moghen daer niet ofdoen noch toedoen van dien dinghen: die god heeft gemaect om datmen hem sal ontsien.

15

Dat ghemaect is: dat blijft hem Die toe te comen sijn si hebben thant gheweest: ende god vernyuwet dat wech gegaen is.

16

Ic hebbe ghesien onder der sonnen inder stat vanden oerdel nydicheit ende inder stat der gherechticheit ongherechticheit:

17

ende ic seide in mijn herte Den gherechtighen ende den nydighen sal god oerdelen: dan sal die tijt sijn van alre dinc.

18

Ic seyde in mijn hert vanden menschen kinderen. datse god prouen soude: ende dat hijse soude thonen den beesten ghelijc wesende.

19

Hier om is den menschen ende den beesten een vergaen: ende des eens ende des anders wesen is ghelijc. Ghelijc dat een mensche sterft: also steruen oec die beesten. Oec ademen si alle: ende die mensche en heeft niet meer dan die beeste. Alle dingen legghen onder die ydelheit:

20

ende si varen alle tot eenre stat Si sijn ghemaect vander aerden: ende te gader worden si echter inder aerden gekeert.

21

Wie weet of adams kinderen gheest opwaert gaet: of der beesten gheest nederwaert gaet.

22

Ende ic worde ghewaer dat niet beter en is dan dat een mensche worde verblijt in sijn werc ende dat dit sijn deel is. Want wie sallen daer toe brenghen: dat hi na hem die toecomende dinghen sal moghen bekennen